Թրամփը հրամանագիր է ստորագրել պետական շենքերը դասական անտիկ ոճով կառուցելու մասին

ԱՄՆ նախագահ Դոնալդ Թրամփը հրամանագիր է ստորագրել, ըստ որի՝ երկրում իշխանության մարմինների նոր շենքերը պետք է կառուցվեն բացառապես դասական անտիկ ճարտարապետական ոճով։ «Արմենպրես»-ի հաղորդմամբ՝ փաստաթուղթը հրապարակվել է Սպիտակ տան կայքում։

«Հիմնադիր հայրերը, ինչպես նրանցից առաջ շատ մեծ հասարակություններ, մեծ նշանակություն են տվել դաշնային քաղաքացիական ճարտարապետությանը։ Նրանք ցանկանում էին, որ Ամերիկայի հասարակական շենքերը ոգեշնչեն ժողովրդին և խրախուսեն քաղաքացիական առաքինությունը»,– նշված է հրամանագրում։

Փաստաթղթում ընդգծվում է նաև, որ ԱՄՆ առաջին նախագահ Ջորջ Վաշինգտոնը և պետքարտուղար Թոմաս Ջեֆերսոնը գիտակցաբար ստեղծել են Վաշինգտոնի ամենակարևոր շենքերը՝ հին Աթենքի և Հռոմի դասական ճարտարապետության օրինակով։