368.54
Գավառի համայնքային գրադարանում տեղի է ունեցել Միքայել Համբարձումյանի «Թափառող ասպետ» գրքի շնորհանդեսը
2 րոպեի ընթերցում
Գավառի համայնքային գրադարանում կայացել է Միքայել (Ֆիլայ) Համբարձումյանի «Թափառող ասպետ» գրքի շնորհանդեսը։
Ինչպես «Արմենպրես»-ին տեղեկացրին Գավառի համայնքապետարանի աշխատակազմից, գիրքը հեղինակի առաջին տպագրված ստեղծագործությունն է։ Գրքի հրատարակչությունն ու շնորհանդեսի կազմակերպչական աշխատանքներն իրականացվել են «Ասողիկ» հրատարակչության, Հայաստանի գրողների միության Գեղարքունիքի մարզային բաժանմունքի ղեկավար, գրող-հրապարակախոս Տիգրան Նիկողոսյանի, ինչպես նաև Գավառի համայնքային գրադարանի աջակցությամբ։
22-ամյա Միքայելն արմատներով Գեղարքունիքի մարզի Նորատուս գյուղից է, սակայն ծնվել և մեծացել է Ռուսաստանի Դաշնության Վոլգոգրադ քաղաքում։ Նա նաև ռուսերեն է թարգմանել Ավետիք Իսահակյանի «Աբու Լալա Մահարի» պոեմը։
«Այս գրքում համադրված են բանաստեղծություններն ու արձակը՝ ներկայացված գեղարվեստական ճանապարհորդության տեսքով՝ Արևմուտքից դեպի Արևելք։
Հեղինակի գլխավոր գաղափարներն են սուրը, կրակը և բառը, որոնք խորհրդանշում են համամարդկային արժեքներ՝ անցյալից մինչև մեր օրերը։ Գիրքը ներառում է նաև փիլիսոփայական որոնում, ինչը միավորում է տարբեր մշակույթների ու ժողովուրդների մարդկանց։
Շնորհանդեսին ներկա էին «Հայաստան» ամսագրի գլխավոր խմբագիր Տիգրան Նիկողոսյանը, Էրեբունի վարչական շրջանի թիվ 11 գրադարանի տնօրեն Քրիստինա Թումաղյանը, գրողի բարեկամները և Գավառի ընթերցասեր հասարակությունը»,-ներկայացրին Գավառի համայնքապետարանի աշխատակազմից։
Բաժանորդագրվեք մեր ալիքին Telegram-ում