Հայաստանի Հանրապետությունը գտնվում է բարեկեցության պատմականորեն ամենաբարձր կետում. Փաշինյան

2025 թվականի օգոստոսի 28-ի դրությամբ Հայաստանի Հանրապետությունը գտնվում է բարեկեցության պատմականորեն ամենաբարձր կետում։ 

«Արմենպրես»-ի փոխանցմամբ՝ ՀՀ կառավարության նիստում այս մասին ասել է ՀՀ վարչապետ Նիկոլ Փաշինյանը։ 

«2025 թվականի օգոստոսի 28-ի դրությամբ Հայաստանի Հանրապետությունը գտնվում է բարեկեցության պատմականորեն ամենաբարձր կետում։ Ընդ որում, ես սա չեմ ասում որպես որևէ արտառոց բան, որովհետև մեր զարգացման տրամաբանությունն այն է, որ ամեն հաջորդ տարվա ցանկացած կետում մենք պետք է ունենանք մեր բարեկեցության ամենաբարձր աստիճանը։ 

Նախորդ շրջանում՝ բյուջեի կատարողականի քննարկման ժամանակ, ես միջին աշխատավարձերի, աշխատատեղերի համեմատություն արեցի և արձանագրեցի, որ Հայաստանի քաղաքացիները 2018 թվականի համեմատ առնվազն 50 տոկոսով ավելի լավ են ապրում։ Պիտի նաև արձանագրեմ, որ հանրային բարեկեցության տվյալները երևում են նաև բանկային համակարգի տվյալներից։ Մասնավորապես, ՀՀ ռեզիդենտ քաղաքացիների բանկային ավանդները և հաշիվները 2017 թվականի համեմատ աճել են 141 տոկոսով։ Սա շատ կոնկրետ ցուցանիշ է, այդ փողը կոնկրետ տեղում կա և դա պատկանում է կոնկրետ մարդկանց։ Իհարկե, մենք վիճակագրության մեջ պետք է զարգացնենք, որ ունենանք նաև տվյալներ, թե այս գումարները քանի անձի են պատկանում»,- ասաց Փաշինյանը։ 

Նա հավելեց, որ 2017 թվականի համեմատ ՀՀ բնակիչներին տված վարկերն աճել են 173 տոկոսով։ 

«Հիմա կարող է լինել արձագանք, թե մարդիկ վարկերի, պարտքերի տակ են ընկել։ Դրա համար է, որ կա մյուս ցուցանիշը. չաշխատող վարկերի պարագայում մենք պատմական մինիմումի վրա ենք։ Այս  պահին մեր վարկերի 1.2 տոկոսն է, որ խնդրահարույց են։ Այս ամբողջ ծավալի մեջ մենք ունենք ընդամենը 1.2 տոկոս խնդրահարույց վարկ»,- նշեց նա։