2 րոպեի ընթերցում
ՀՀ կրթության, գիտության, մշակույթի և սպորտի նախարարության աջակցությամբ, «Երեխաների հատուկ ստեղծագործական կենտրոն» ՊՈԱԿ-ի նախաձեռնությամբ մեկնարկել է Ֆրեսկո» արդի արվեստի և հոգևոր ֆիլմերի միջազգային ներառական 12-րդ փառատոնը։
Ինչպես «Արմենպրես»-ին տեղեկացրին ՀՀ կրթության, գիտության, մշակույթի և սպորտի նախարարությունից, այս տարի միջոցառումները կիրականացվեն Կոտայքի մարզում և Երևանում։
«Փառատոնի մեկնարկին ընդառաջ Լոռու մարզում կազմակերպվեց ներառական մշակութային ճամբար, որը միտված է խոցելի խմբերի երեխաների ստեղծագործական ներուժի բացահայտմանը և մշակութային ինտեգրմանը։
Փառատոնի հանդիսավոր բացման արարողությունը տեղի ունեցավ օգոստոսի 22-ին ՀՀ Կոտայքի մարզի Աբովյան քաղաքում՝ դաշնակահար Լևոն Կարապետյանի, Թաթուլ Ալթունյանի անվան Հայաստանի երգի-պարի պետական վաստակավոր անսամբլի, «Զալյան Վոյս ստուդիայի» և Երևանի լսողության խանգարումներ ունեցող երեխաների հատուկ կրթահամալիրի ժեստերի երգչախմբի մասնակցությամբ։
Այս տարի փառատոնի ծրագիրը ներառելու է՝ 52 ֆիլմ 35 երկրից, համերգային ծրագրեր, թատերական ներկայացումներ, վարպետության դասեր։
«Ֆրեսկո»-ն մշակութային երկխոսության յուրօրինակ հարթակ է, որը Հայաստանը վերածում է ժամանակակից շփումների խաչմերուկի։ Բացօթյա ցուցադրություններն ու «առանց տոմսի» միջոցառումները օրեր շարունակ կդառնան ինչպես հայաստանցիների, այնպես էլ զբոսաշրջիկների ամենասիրված մշակութային իրադարձություններից։
Փառատոնը համադրում է մշակութային, հոգևոր և սոցիալական արժեքներ, միավորում է արդի արվեստի տարբեր ձևեր և հոգևոր թեմատիկ ֆիլմեր՝ ընդգծելով արվեստի դերը մարդու ներաշխարհի բացահայտման, սոցիալական արդարության, ներառականության և միջմշակութային երկխոսության խթանման գործում»,- ասվում է հաղորդագրության մեջ։
Փառատոնի ծրագիրն՝ այստեղ։