Հայաստանում օդի ջերմաստիճանը կնվազի 4-6 աստիճանով

Հանրապետություն կներթափանցեն սառը օդային հոսանքներ, օգոստոսի 9-11-ն ընկած ժամանակահատվածում օդի ջերմաստիճանը կնվազի մոտ 4-6 աստիճանով: 

«Արմենպրես»-ի փոխանցմամբ՝ այս մասին հայտնում է ՀՀ շրջակա միջավայրի նախարարության «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրենի տեղակալ Գագիկ Սուրենյանը:

«Մեր երկրին արևմուտքից մոտենում են սառը օդային հոսանքներ: Այդ սառը օդային հոսանքների ներթափանցումը կսկսվի վաղը՝ օգոստոսի 9-ին հետկեսօրյա ժամերից և կշարունակվի մինչև օգոստոսի 11-ը ներառյալ: Այսպիսով օգոստոսի 9-11-ն ընկած ժամանակահատվածում և՛ գիշերային, և՛ ցերեկային ժամերին հանրապետության ողջ տարածքում օդի ջերմաստիճանն այսօրվա համեմատ կնվազի մոտ 4-6 աստիճանով: Եվ արդեն օգոստոսի 11-ին հանրապետության ամենաշոգ հատվածներում՝ Արարատյան դաշտում, Սյունիքի հովիտներում, Երևանում, գիշերային ժամերին նույնիսկ կզգանք զովություն»,-նշում է Սուրենյանը: 

Բացի այդ, օգոստոսի 9-13-ն ընկած ժամանակահատվածում երեկոյան ժամերին հանրապետության առանձին հատվածներում սպասվում են ամպրոպային բնույթի կարճատև անձրևներ, ամպրոպների ժամանակ՝ քամու ուժգնացում մինչև 18 մ/վ արագությամբ: