2 րոպեի ընթերցում
Եվրոպական դիվանագիտության ղեկավար Կայա Կալլասը հաջորդ շաբաթ կհայտարարի Իսրայելի դեմ սահմանափակող միջոցառումների տարբերակների մասին՝ կապված Գազայի հատվածում նրա ռազմական գործողության հետ։
Ինչպես հաղորդում է «Արմենպրես»-ը՝ վկայակոչելով «ՏԱՍՍ»-ը, այս մասին հաղորդում է Euractiv պորտալը։
Աղբյուրի հաղորդմամբ՝ քննարկվում են մի քանի սցենարներ, այդ թվում՝ Իսրայելի և ԵՄ-ի միջև Ասոցացման համաձայնագրի լրիվ կամ մասնակի կասեցում, պաշտոնյաների, զինվորականների և նորաբնակների նկատմամբ պատժամիջոցներ: ԵՄ-ն կարող է սահմանափակել Իսրայելի հետ առևտուրը, զենքի էմբարգո սահմանել կամ կասեցնել գիտատեխնիկական համագործակցությունը:
Euractriv-ը նշում է, որ ԵՄ-ի հետ Ասոցացման համաձայնագրի կասեցումը հնարավոր է միայն այս միջոցառմանը ազգային կառավարությունների միաձայն աջակցության դեպքում: Պորտալի զրուցակիցների կարծիքով՝ ամենայն հավանականությամբ Եվրամիությունը կսահմանափակվի կոնկրետ անձանց դեմ պատժամիջոցներով, ինչպես արդեն արել են Ավստրալիան, Մեծ Բրիտանիան, Կանադան, Նոր Զելանդիան և Նորվեգիան:
ԵՄ արտաքին գործերի նախարարները, ինչպես սպասվում է, հնարավոր միջոցառումները կքննարկեն հուլիսի 15-ին՝ նույն օրը, երբ Իսրայելը, ինչպես սպասվում է, զեկույց կներկայացնի Գազայի հատվածում մարդասիրական իրավիճակի բարելավման վերաբերյալ։