2 րոպեի ընթերցում
Բոլիվիայի կառավարությունը դիմել է դատախազություն՝ նախկին նախագահ Էվո Մորալեսի դեմ բողոքով, որում նրան մեղադրում են մի քանի հանցագործությունների, այդ թվում՝ ահաբեկչության մեջ՝ նրա կողմնակիցների գործողությունների պատճառով: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտնել է արդարադատության և ինստիտուցիոնալ թափանցիկության նախարար Սեսար Սիլեսը:
«Մենք բողոք ենք ներկայացրել ութ հանցագործությունների փաստով, որոնք նախապես վերագրվում են պարոն Էվո Մորալեսին…. և նրանց, ովքեր կատարողներն են, մասնակիցները, հանցակիցները կամ քողարկողները», - լրագրողներին ասել է նախարարը:
Սիլեսի խոսքով՝ կառավարությունը Մորալեսին մեղադրում է «ահաբեկչության, հանցագործությունների հրապարակային հրահրման, պետական ծառայությունների և տրանսպորտի անվտանգության դեմ ոտնձգության, աշխատանքի ազատության դեմ ոտնձգության, սահմանադրական որոշումներին չենթարկվելու, պետական սեփականության ոչնչացման և ընտրական գործընթացին խոչընդոտելու մեջ»:
«Մենք գլխավոր դատախազին խնդրել ենք գործել արագ», - հավելել է նախարարը:
Մորալեսի կողմնակիցներն արդեն մի քանի օր է՝ փակում են ճանապարհները Կոչաբամբայի դեպարտամենտում: Բախումների հետևանքով տուժել է առնվազն 19 ոստիկան: Բոլիվիայի նախագահ Լուիս Արսեն հունիսի 3-ին մեղադրել է Մորալեսին, որ նա ուժով փորձում է հասնել պետության ղեկավարի ընտրություններին մասնակցության և պատրաստ է խափանելու դրանք, եթե իրեն դա թույլ չտան։
Մորալեսն աջակցել է Արսեին 2020 թվականի հոկտեմբերին կայացած նախագահական ընտրություններում։ Սակայն ավելի ուշ քաղաքական գործիչների միջև առաջացել են տարաձայնություններ, այդ թվում՝ այն պատճառով, թե ով պետք է դառնա իշխող «Շարժում դեպի սոցիալիզմ» կուսակցության նախագահի թեկնածու։ Արդյունքում, առաջիկա ընտրություններում, որոնք պետք է տեղի ունենան օգոստոսի 17-ին, կուսակցությունը պատրաստվում է ներկայացնել ներքին գործերի նախկին նախարար Կառլոս Էդուարդո դել Կաստիլիոն: