Գյումրիում մեկնարկեց «Հայաստան» երգչախմբային հանրապետական մրցույթ-փառատոնը

Գյումրու Կամերային երաժշտության դահլիճում մայիսի 28-ին մեկնարկեց «Հայաստան» երգչախմբային հանրապետական մրցույթ-փառատոնը: Ինչպես տեղեկացնում է «Արմենպրես»-ը, արդեն չորրորդ անգամ անցկացվող մրցույթ-փառատոնին մասնակցում են հանրապետության 7 մարզերի 18 համայնքներից եւ մայրաքաղաք Երեւանից Գյումրի ժամանած 29 երգչախումբ՝ շուրջ 900 անդամների մասնակցությամբ:

«Հայաստան» երգչախմբային մրցույթ-փառատոնը կազմակերպվում է Գյումրու համայնքապետարանի մշակույթի և երիտասարդության հարցերի բաժնի նախաձեռնությամբ։

«Սա եւ՛ աշխարհագրական ընդգրկմամբ, ե՛ւ մասնակիցների քանակով աննախադեպ ցուցանիշ է՝ նախորդ տարիների համեմատությամբ։ Երբ սկսեցինք, ընդամենը 7 երգչախումբ էր մասնակցում, այսօր արդեն 29: Մրցույթ-փառատոնի ավարտին Գյումրու արվեստի ու երաժշտական դպրոցների միասնական երգչախումբը՝ շուրջ 200 մասնակից, միասին կկատարեն Ստեփան Լուսիկյանի «Ազատ Հայաստան» հայտնի ստեղծագործությունը»,-«Արմենպրես»-ին հայտնեց Գյումրու համայնքապետարանի մշակույթի և երիտասարդության հարցերի բաժնի ղեկավար Լիլիթ Թովմասյանը: 

Փառատոնն անցկացվում է երեք՝ A, B, C դասակարգումներով։ Մրցանակային տեղերը, համապատասխանաբար, I, II, III կարգի դիպլոմներով տրվում են յուրաքանչյուր երեք անվանակարգի համար։ Կարգ A դասակարգմամբ փառատոնին մասնակցում են առանձին պրոֆեսիոնալ երգչախմբերը, երաժշտական բուհերի և քոլեջների, ինչպես նաև երաժշտական և արվեստի դպրոցների երգչախմբերը։ Կարգ B դասակարգմամբ փառատոնին մասնակցում են միայն արվեստի և երաժշտական դպրոցների երգչախմբերը։ Կարգ C դասակարգմամբ փառատոնին մասնակցում են հանրակրթական դպրոցների, մանկապատանեկան ստեղծագործական կենտրոնների, մշակութային և հասարակական կազմակերպությունների երգչախմբերը։

Ժյուրիի նախագահն է ՀՀ Արվեստի վաստակավոր գործիչ, ՀՀ Պետական Մրցանակի դափնեկիր, կոմպոզիտոր Երվանդ Երկանյանը: