2 րոպեի ընթերցում
Հայաստանի ազգային ժողովի նախագահ Ալեն Սիմոնյանը երկրորդ նախագահ Ռոբերտ Քոչարյանին մեղադրեց ռուսական շահերը հետապնդելու և այդ ուղղությամբ ծառայություններ մատուցելու մեջ:
«Արմենպրես»-ի հաղորդմամբ` Սիմոնյանը նման տեսակետ հայտնեց խորհրդարանում լրագրողների հետ զրույցում:
«Ես կարծում եմ, որ Ռոբերտ Քոչարյանը ռուսական շպիոնի կարգավիճակ ունեցող մարդ է Հայաստանի Հանրապետությունում: Նա ռուսական շահերը հետապնդող և միայն այդ ուղղությամբ ծառայություն մատուցող քաղաքական գործիչ է»,–ասաց ԱԺ նախագահը:
Սիմոնյանը նշեց, որ դա իր կարծիքն է, ինքը քաղաքական գործիչ է, ունի քաղաքական հայտարարություն անելու ազատություն:
«Ես տեսնում եմ այն գործունեությունը, այն տեքստերը և այն հայտարարությունները, որոնք արվում են նրա կողմից, և դա իմ քաղաքական գնահատականն է: Երբ դու հայտարարություն ես անում, որը կատարյալ ձևով համընկնում է ռուսական հայտարարությունների հետ, երբ քո խմբակցության անդամները ելույթներ են ունենում, որոնք համընկնում են ռուսական կողմի տեսակետների հետ, ես կարող եմ նման հետևություններ անել: Գաղտնիք չէ՝ Ռոբերտ Քոչարյանի կողմից սատարված և Ռոբերտ Քոչարյանին քաղաքական առաջնորդ համարող Գյումրիի քաղաքապետը հայտարարում է, որ ինքը տեսնում է Հայաստանը Ռուսաստան–Բելառուս միութենական կազմի մեջ»,-ասաց Սիմոնյանը:
Նա հավելեց, որ այդպիսի բազմաթիվ օրինակներ կան, որ իրեն թույլ են տալիս նման պնդում անել: