Հայաստանը դեսպանություն կբացի Օմանի Սուլթանությունում. կառավարությունը հաստատեց համապատասխան նախագիծը

Կառավարության ապրիլի 30-ի նիստում ընդունվել է որոշում Օմանի Սուլթանության մայրաքաղաք Մասկատում Հայաստանի Հանրապետության դեսպանություն հիմնելու վերաբերյալ։

«Արմենպրես»-ի հաղորդմամբ՝ որոշման նպատակն է ամրապնդել Հայաստանի և Օմանի միջև քաղաքական, տնտեսական և մշակութային հարաբերությունները։ 

ՀՀ արտաքին գործերի նախարարության ներկայացրած նախագծում ընդգծվում է, որ վերջին տարիներին նկատվում է ակտիվ համագործակցություն Հայաստանի և Ծոցի արաբական երկրների, այդ թվում՝ Օմանի հետ։ Բարեկամական կապերը ներառում են փոխադարձ առևտուրը, օդային հաղորդակցությունը, ՏՏ ոլորտը, կրթությունը, գիտությունը, մշակույթը և զբոսաշրջությունը։

Նախագծով առաջարկվում է դեսպանության հիմնումը իրականացնել՝ հաշվի առնելով Օմանի դերը տարածաշրջանում որպես չեզոք և հավասարակշռված քաղաքականություն վարող պետություն։ Հայաստանը նման նախաձեռնությամբ նպաստում է ինչպես երկկողմ հարաբերությունների խորացմանը, այնպես էլ Արևելյան Աֆրիկայի և Հնդկական օվկիանոսի երկրների հետ կապերի զարգացմանը։ 

Դեսպանության բացման և առաջին տարվա գործունեության համար ընդհանուր ծախսը կկազմի մոտ 133.8 միլիոն դրամ (345.7 հազար դոլար)։ 2025 թվականի հուլիսից դեկտեմբեր ամիսների ընթացիկ ծախսերը կկազմեն շուրջ 81.9 միլիոն դրամ, իսկ 51.8 միլիոն դրամ կուղղվի միանվագ ձեռքբերումներին՝ մեքենա, կահույք, տեխնիկա և այլ անհրաժեշտ պարագաներ։ Նշված գումարից հիմնական մասը կհատկացվի ԱԳՆ բյուջեից, իսկ մնացածը՝ կառավարության պահուստային ֆոնդից։