Էներգիան և փողն ավելի կարևոր չեն, քան մարդիկ․ ԵԽ պատգամավորը քննադատել է Կայա Կալասին Բաքվում արած հայտարարությունների համար

Եվրախորհրդարանի հույն պատգամավոր Ֆրագկոս Էմանուիլ Ֆրագկուլիսը քննադատել է Եվրոպական միության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասի հայտարարությունը, թե Ադրբեջանը ԵՄ-ի համար կարևոր տարածաշրջանային գործընկեր է։ 

«Արմենպրես»-ի հաղորդմամբ՝ այս մասին հույն պատգամավորը գրառում է կատարել X-ի իր միկրոբլոգում։  

«Եվս մեկ անգամ Կայա Կալասը ցույց է տալիս ոչ միայն սկզբունքների բացակայությունը, այլև կոմպետենտության պակասը։ Նման առաջնորդությամբ ԵՄ-ն ունի վավերականության ժամկետ։ 

Տիկին Կալաս, ո՛չ, էներգիան և փողն ավելի կարևոր չեն, քան մարդիկ։ Մենք կանգնած ենք արդարության և ժողովրդավարության կողքին։ Մենք կանգնած ենք մեր հայ եղբայրների և քույրերի՝ թուրքերի կողմից ավելի քան մեկ  դար շարունակվող ցեղասպանության զոհերի կողքին»,-ընդգծել է հույն պատգամավորը։

Once again @kajakallas demonstrates the lack of principles, but also of competence. With such leadership, the EU has an expiration date.
Ms. Kallas, NO!
Energy and money do not matter more than the people. We stand with Justice & Democracy. We stand with our 🇦🇲 Brothers and… https://t.co/w2rDoOYyut

— FRAGKOS EMMANOUIL FRAGKOULIS MEP🇬🇷 (@e_fragkos) April 25, 2025

Ադրբեջանի արտաքին գործերի նախարար Ջեյհուն Բայրամովի հետ համատեղ մամուլի ասուլիսի ընթացքում Կայա Կալասը նշել է, թե Ադրբեջանը տարածաշրջանում կարևոր գործընկեր է, և ԵՄ-ն և Ադրբեջանը զգալի առաջընթաց են գրանցել իրենց կապերը ամրապնդելու գործում։

Ավելի վաղ, Եվրախորհրդարանի հույն պատգամավոր Ֆրագկոս Էմանուիլ Ֆրագկուլիսը քննադատել էր Եվրոպական միության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասին՝ Ադրբեջան այցելելու պլանների համար և, մասնավորապես, նշել էր․ «Հայաստանն ընտրում է ժողովրդավարությունը, ընդունում է Եվրոպական միության անդամակցության օրենքը, բախվում է սպառնալիքների, սակայն ԵՄ արտաքին քաղաքականության ղեկավարն այցելում է ավտոկրատ Ադրբեջան. ինչո՞ւ վարձատրել ագրեսորին և անտեսել բարեփոխիչին: Կայա Կալաս, ի՞նչ մեսիջ եք ուղարկում դեմոկրատական ​​Հայաստանին, որը պաշտպանում է իր հողերն Ադրբեջանից»։