Դատավորի փոփոխության պարագայում դատական գործընթացը կարող է զրոյից չսկսվել․ նախարարության նոր նախագիծը

Արդարադատության նախարարությունը նախաձեռնել է օրենսդրական փոփոխություն, ըստ որի՝ դատավորի փոփոխության դեպքում գործի քննությունը հնարավոր կլինի կողմերի համաձայնությամբ շարունակել նույն կետից՝ բացառելով գործընթացի մեկնարկը զրոյից։ «Արմենպրես»-ի հաղորդմամբ՝ Երևանում կայացած «Արդարադատությունը որպես արդարության հասնելու գործիք» խորագրով համաժողովին այս մասին հայտարարեց արդարադատության նախարար Սրբուհի Գալյանը։

Նրա խոսքով՝ այս իրավիճակը բերում է այն նրան, որ նույն գործով դատական գործընթացը ստիպված սկսվում է նորից։

«Օրինակ՝ Գորիսում ունենք նման խնդիր, երբ գործերի քննությունը անընդհատ սկսվում է զրոյից։ Մեր օրենսդրական նախաձեռնությունը վերաբերում է նրան, որ դատավորի փոփոխության պարագայում գործի քննությունը զրոյից չսկսվի, այլ կողմերի համաձայնության պարագայում նոր դատավորը հնարավորություն ունենա գործը շարունակել այն կետից, որտեղ այն թողել էր նախորդ դատավորը», – ընդգծեց արդարադատության նախարարը։