390.33
Երևանի քաղաքապետը կընդունի Անաստաս Միկոյան 64 շենքի բնակիչներին
1 րոպեի ընթերցում
Երևանի քաղաքապետ Տիգրան Ավինյանը Անաստաս Միկոյան 64 շենքի բնակիչներին ապրիլի 16-ին կընդունի: «Արմենպրես»-ի փոխանցմամբ՝ այս մասին տեղեկացրել է Երևանի քաղաքապետի մամուլի խոսնակ Հայկ Կոստանյանը՝ «Ֆեյսբուք»-ի իր էջում կատարած գրառման միջոցով:
«Այսօր առավոտից «Անաստաս Միկոյան 64» շենքի բնակիչները փակել են Անաստաս Միկոյան փողոցը (Եղվարդի խճուղի)՝ բարձրաձայնելով մի շարք խնդիրներ, որոնք առնչվում են պետական, տեղական ինքնակառավարման և իրավապահ մարմինների լիազորություններին։
Տեղեկացնում եմ, որ Երևանի քաղաքապետ Տիգրան Ավինյանը ներկայումս գտնվում է գործուղման մեջ։
Քաղաքապետը բնակիչներին կընդունի ապրիլի 16-ին»,- նշված է գրառման մեջ:
Անաստաս Միկոյան 64 հասցեի բնակիչները ապրիլի 14-ին ժամը 08:00-ից փակել են Եղվարդի խճուղին: Բնակիչները տարածել են հայտարարություն, որտեղ նշված է նրանց պահանջները։
«Երևանի քաղաքապետարանը անդադար գովազդում է, թե ինչպես են վերադարձնում կամ ազատագրում ժամանակին զավթած կանաչ և բակային տարածքները, բայց միաժամանակ մեզանից ապօրինի որոշումներով խլում 4000քմ կանաչապատ բակային տարածք»,- մասնավորապես ասված է բնակիչների տարածած հայտարարությունում։
Բաժանորդագրվեք մեր ալիքին Telegram-ում