2 րոպեի ընթերցում
Պակիստանի զորքերն ապրիլի 1-ին ներխուժել են Հնդկաստանի տարածք ՝ Ջամու և Քաշմիրի միութենական տարածքի Պունչի հատվածում և կրակ են բացել վերահսկողության գծի երկայնքով, որը բաժանում է Քաշմիրի հնդկական և պակիստանյան գոտիները:
«Արմենպրես»-ի փոխանցմամբ՝ Hindustan Times պարբերականը, վկայակոչելով Հնդկաստանի զինված ուժերի ներկայացուցչին, հաղորդել է, որ չհրահրված ներխուժմանը հնդիկ զինվորականները տվել են «արդյունավետ, վերահսկվող և ստուգված պատասխան»։
«Իրավիճակը գտնվում է վերահսկողության ներքո և հանգամանորեն հսկվում է: Հնդկական բանակը կրկին հայտարարում է փոխըմբռնման սկզբունքների պահպանման կարևորության մասին, որը ձեռք է բերվել 2021 թվականին Հնդկաստանի և Պակիստանի զինված ուժերի ներկայացուցիչների միջև՝ վերահսկողության գծի երկայնքով խաղաղության պահպանման համար», - ընդգծել է բանակի ներկայացուցիչը:
Ինչպես նշում են տեղական զանգվածային լրատվամիջոցները, Ջամու և Քաշմիրի հնդկական տարածք պակիստանցի զինվորների ներխուժման միջադեպը տեղի է ունեցել այդ տարածաշրջան Հնդկաստանի ներքին գործերի նախարար Ամիտ Շահի՝ ապրիլի 7-8-ը կատարելիք այցի նախաշեմին։ Ըստ առկա տեղեկությունների՝ պակիստանյան զորքերը կարող էին լարվածություն հրահրել վերահսկողության գծում, որպեսզի ապահովեն պակիստանամետ անջատողական խմբավորումերի ներթափանցումը Հնդկաստան: Պունչի հատվածում այս պահին լայնածավալ հակաահաբեկչական գործողություն է ընթանում։
Քաշմիրը մնում է Հնդկաստանի և Պակիստանի միջև սուր վիճաբանության առարկա 1947 թվականից, երբ Բրիտանական Հնդկաստանն, ստանալով անկախություն, բաժանվեց երկու պետությունների՝ կրոնական հատկանիշով: Քաշմիրում չկա պետական սահման, նրա տարածքը բաժանում է վերահսկողության գիծը, որի երկայնքով Հնդկաստանը և Պակիստանը պահպանում են հրադադարի ռեժիմը։ Հնդկական մասում ակտիվորեն գործում են խմբավորումներ, որոնք հանդես են գալիս երկրից տարածաշրջանի անջատման օգտին։ Նյու Դելին Պակիստանին է մեղադրում ծայրահեղականներին աջակցելու մեջ. Իսլամաբադը ժխտում է այդ մեղադրանքները: