2 րոպեի ընթերցում
Հայաստանի Ազգային ժողովի նախագահ Ալեն Սիմոնյանը ստացել է «Քաղաքացիական պայմանագիր» խմբակցության պատգամավոր Վիլեն Գաբրիելյանի՝ մանդատից հրաժարվելու դիմումը։
«Արմենպրես»-ին այս մասին հայտնեց ՀՀ ԱԺ նախագահի մամուլի խոսնակ Մովսես Հարությունյանը։
Ավելի ուշ հայտարարություն է տարածել Հայաստանի ԱԺ նախագահը :
««Ազգային ժողովի կանոնակարգ» սահմանադրական օրենքի 155-րդ հոդվածի 1-ին մասի համաձայն` Հայաստանի Հանրապետության Ազգային ժողովի պատգամավոր Վիլեն Գաբրիելյանը 2025 թվականի ապրիլի 1-ին հրաժարականի դիմում է ներկայացրել:
«Ազգային ժողովի կանոնակարգ» սահմանադրական օրենքի 155-րդ հոդվածի 2-րդ մասի համաձայն` եթե հրաժարականի հրապարակումից հետո՝ մեկ շաբաթվա ընթացքում, պատգամավորը գրավոր դիմումով հետ է վերցնում հրաժարականի մասին իր դիմումը, ապա Ազգային ժողովի նախագահն այդ մասին հանդես է գալիս հայտարարությամբ, եթե հետ չի վերցնում հրաժարականի մասին իր դիմումը, ապա նրա լիազորությունների դադարման մասին կազմվում է արձանագրություն, որը ստորագրում եւ հրապարակում է Ազգային ժողովի նախագահը: Արձանագրության հրապարակման պահից հրաժարականը համարվում է ընդունված»,- նշված է Ալեն Սիմոնյանի հայտարարության մեջ:
«Քաղաքացիական պայմանագիր» խմբակցության պատգամավոր Վիլեն Գաբրիելյանն ավելի վաղ հայտնել էր մանդատից հրաժարվելու մասին։ Նրա որոշումը կապված էր մարտի 30-ին Գյումրիում ավագանու արտահերթ ընտրությունների ընթացքում իր պահվածքի հետ։ Պատգամավորն այդ օրը աչքի էր ընկել ագրեսիվ պահվածքով, հայտնվել մի քանի միջադեպերի կիզակետում։ Տարածված տեսանյութերից երևում է, որ պատգամավորն այդ օրը գտնվել է ոչ սթափ վիճակում։
Վիլեն Գաբրիելյանը նաև ներողություն է խնդրել իր պահվածքի համար: