Մարտի 3-րդ շաբաթվա տվյալներով Հայաստանում գրանցվել է սուր շնչառական վարակներով պայմանավորված ակտիվության նվազում
2 րոպեի ընթերցում
2025 թվականի 12-րդ շաբաթվա տվյալների համաձայն Հայաստանում գրանցվել է սուր շնչառական վարակներով պայմանավորված ակտիվության նվազում. առողջության առաջնային պահպանման կազմակերպություններ մարտի 17- 23-ը դիմել է 7866 բուժառու: Դեպքերի 75,9 տոկոսը 0-18 տարեկան երեխաներն են:
«Արմենպրես»-ի հետ զրույցում այս մասին ասաց ՀՀ առողջապահության նախարարության Հիվանդությունների վերահսկման և կանխարգելման ազգային կենտրոնի (ՀՎԿԱԿ) վարակիչ հիվանդությունների համաճարակաբանության վարչության բժիշկ-համաճարակաբան Աիդա Հովհաննիսյանը՝ նշելով, որ այս ցուցանիշը նախորդ շաբաթվա համեմատ նվազել է:
Նույն ժամանակահատվածում սուր շնչառական վարակներով Հայաստանի բուժհաստատություններում հոսպիտալացվել է 791 բուժառու: Նրանց 96 տոկոսը կրկին 0-18 տարեկան երեխաներն են: Մասնագետի խոսքով՝ այստեղ ևս նախորդող շաբաթվա համեմատ կա նվազում:
«Ըստ լաբորատոր հետազոտությունների արդյունքների՝ 12-րդ շաբաթվա ընթացքում Հայաստանում շրջանառվում է գրիպի A տեսակի H1 ենթատեսակը, գրիպի B տեսակի հարուցիչները, ինչպես նաև սինցիցիալ վիրուսը, ռինովիրուսը, ադենովիրուսը»,- ասաց Հովհաննիսյանը:
Աիդա Հովհաննիսյանը նաև նկատում է՝ 12-րդ շաբաթվա դրությամբ թոքաբորբով հոսպիտալացվել է 454 բուժառու, նրանցից 69,2 տոկոսը կրկին անչափահասներն են:
«Թոքաբորբով պայմանավորված՝ 12-րդ շաբաթվա ընթացքում դիմել է 771 բուժառու, ցուցանիշը նախորդ շաբաթվա համեմատ նույնպես նվազել է 1,1 անգամ: Թոքաբորբով պայմանավորված դիմելիության 66,3 տոկոսը ևս 0-18 տարեկաններն են»,- նշեց նա:
Մասնագետը խորհուրդ տվեց չզբաղվել ինքնաբուժությամբ, հատկապես՝ չօգտագործել հակաբիոտիկներ: Նա նշեց՝ երեք և ավելի օր ջերմելու դեպքում պարտադիր պետք է դիմել տեղամասային բժշկին ու իրականացնել կանխարգելիչ միջոցառումներ: Հատկապես անհրաժեշտ է պարբերաբար մաքրել և ախտահանել տան, աշխատավայրի մակերեսները, օդափոխել տարածքները: