2 րոպեի ընթերցում
Գազայի հատվածի հյուսիսում գտնվող Ջաբալիա քաղաքում Իսրայելի կողմից պատերազմի վերսկսման իններորդ օրը զոհվել է 11 մարդ, այդ թվում՝ մայրը և նրա հինգ երեխաները, գրանցվել են մի քանի վիրավորներ: «Արմենպրես»-ի փոխանցմամբ՝ այս մասին հայտնել է Al Jazeera-ն։
Իսրայելական ուղղաթիռը գնդակոծել է Գազայի հատվածի Շուջայա թաղամասի, ինչպես նաև Զեյթուն թաղամասի շրջանները:
Գազայի Առողջապահության նախարարությունը հայտնել է առաջին անհրաժեշտության դեղորայքի խիստ պակասի մասին՝ նշելով, որ իսրայելական ուժերը ոչնչացրել են առողջապահության ոլորտի մեծ մասը, ինչի հետևանքով շատ մարդիկ են մահանում դեղորայքի բացակայության պատճառով:
Իսրայելական ուժերը շարունակում են հարձակումները Հորդանան գետի Արևմտյան ափի պաղեստինյան քաղաքների և բնակավայրերի ուղղությամբ՝ ավերելով ու այրելով բնակելի տները, քանդելով խանութները և իրականացնելով համատարած ձերբակալություններ:
Մեծ Բրիտանիայի առողջապահության նախարար Ուես Սթրիթինգը հայտարարել է, որ Իսրայելի հարձակումները Գազայի հատվածի վրա չհիմնավորված են և անհանդուրժելի՝ ավելացնելով, որ գործողությունները չեն կարող արդարացվել որպես ինքնապաշտպանություն և պետք է դադարեցվեն։
Գազայի առողջապահության նախարարության տվյալներով՝ մարտի 18-ին Իսրայելի կողմից ռազմական գործողությունների վերսկսումից ի վեր 792 պաղեստինցի է զոհվել, ևս 1663-ը՝ վիրավորվել, որոնց մեծ մասը կանայք և երեխաներ են։
