Ռուսաստանն ու Ուկրաինան փոխադարձ հարվածներ են հասցրել միմյանց Թրամփ-Պուտին բանակցություններից հետո

Ուկրաինայի նախագահ Վոլոդիմիր Զելենսկին հայտարարել է, որ ռուսական զորքերը մարտի 18-ի ուշ երեկոյան անօդաչու թռչող սարքերով մի քանի տասնյակ հարվածներ են հասցրել Ուկրաինային։ 

«Արմենպրես»-ի փոխանցմամբ՝ այս մասին Զելենսկին գրել է Telegram-ի իր ալիքում։

«Այժմ շատ շրջաններում լսելի է այն, ինչ իրականում պետք է Ռուսաստանին: Մեր երկնքում մոտ 40 «Շահիդ» կա: Ցավոք, հարվածներ են ուղղվում հենց քաղաքացիական ենթակառուցվածքների ուղղությամբ: «Շահիդն» ուղղակիորեն հարվածել է Սումիի հիվանդանոցին, Դոնեցկի շրջանի քաղաքներին»,- նշել է նա՝ ավելացնելով, որ հարվածների են ենթարկվել նաև Կիևի, Ժիտոմիրի, Սումիի, Չեռնիգովի, Պոլտավայի, Խարկովի, Կիրովոգրադի, Դնեպրոպետրովսկի և Չերկասի շրջանները։

Euronews-ի փոխանցմամբ՝ ռուսական անօդաչու թռչող սարքերի վերջին հարձակումը Ուկրաինայի վրա տեղի է ունեցել ԱՄՆ և ՌԴ նախագահներ Դոնալդ Թրամփի և Վլադիմիր Պուտինի հեռախոսազրույցից ժամեր անց:

Զելենսկին աջակցել է հարվածների դադարեցման գաղափարին, սակայն նշել է, որ Ուկրաինան կպատասխանի ցանկացած հարձակման։ «Չի կարող այնպես լինել, որ Ռուսաստանը հարձակվի մեր էներգետիկ ոլորտի վրա, և մենք լռենք, մենք կպատասխանենք»,- ասել է նա։

Ուկրաինական անօդաչու սարքերը ևս հարվածներ են հասցրել Ռուսաստանին։ Կրասնոդարի երկրամասի Կրոպոտկինի մոտ գտնվող Կավկազսկայա գյուղի նավթի պահեստում հրդեհ է բռնկվել։ Տեղական իշխանությունները հայտնել են, որ կործանված անօդաչու թռչող սարքերի բեկորները վնասել են տանկերի միջև գտնվող խողովակաշարը: 

ՌԴ պաշտպանության նախարարությունը պնդել է, որ մարտի 19-ի գիշերը 57 անօդաչու թռչող սարք է խոցվել Ռուսաստանի շրջանների երկնքում։ 

BBC-ի փոխանցմամբ՝ մարտի 19-ի առավոտյան ՌԴ պաշտպանության նախարարությունը հայտարարել է, որ Պուտինի և Թրամփի զրույցից հետո հրաման է ստացել «ժամանակավորապես դադարեցնել հարվածներն Ուկրաինայի էներգետիկ ենթակառուցվածքների ուղղությամբ»։ 

Ավելի վաղ ԱՄՆ և ՌԴ նախագահներ Դոնալդ Թրամփի և Վլադիմիր Պուտինի միջև տեղի ունեցած հեռախոսազրույցի ընթացքում կողմերը պայմանավորվել են անհապաղ դադարեցնել կրակը ողջ էներգետիկայի և ենթակառուցվածքների ուղղությամբ։