Այս տարվանից կմեկնարկի բարձր տեխնոլոգիաների ոլորտի աջակցության յոթամյա նոր ծրագիրը

ՀՀ կառավարությունը 2025 թվականից կմեկնարկի յոթամյա նոր ծրագիր, որը նպատակ ունի աջակցել բարձր տեխնոլոգիաների ոլորտի զարգացմանը։ «Արմենպրես»-ի հաղորդմամբ՝ այս մասին ՀՀ կառավարության հերթական նիստի ժամանակ հայտարարեց Բարձր տեխնոլոգիական արդյունաբերության նախարար Մխիթար Հայրապետյանը։

Նրա խոսքով՝ ծրագիրը բաղկացած է երկու հիմնական գործիքակազմից, որոնցից առաջինը աջակցության ծրագրերն են, որոնք կենտրոնանալու են երեք հիմնական ուղղությունների վրա։

«2022 թվականի մարտի 1-ից ներգրավված կամ ներգրավվող աշխատանքային միգրանտների դեպքում ընկերությունները կստանան եկամտահարկի 60 տոկոս աջակցություն։ Եկամտահարկի 60 տոկոսը կվերադարձվի այն ընկերություններին, որոնք կընդունեն նորավարտ բուհական շրջանավարտների, ինչպես նաև վերամասնագիտացված մասնագետների։ Եկամտահարկի 50 տոկոս աջակցություն կտրամադրվի այն ընկերություններին, որոնք ներգրավում են վերապատրաստվող աշխատակիցների։

Եթե նախկին տարիներին կառավարությունը հիմնականում թիրախավորում էր ՏՏ ոլորտը, ապա այս ծրագրում առաջին անգամ սահմանվել է, թե որոնք են բարձր տեխնոլոգիաները»,-ընդգծեց նախարարը։

Նախարարը նշեց, որ 2025 թվականի հունվարի 1-ից ծրագրի շահառու կարող են դառնալ հետևյալ ոլորտներում գործող ընկերությունները՝ համակարգիչների և օպտիկական սարքավորումների արտադրություն, օդանավերի և տիեզերանավերի արտադրություն, ծրագրային ապահովման մշակում, տեղեկատվական ծառայությունների մատուցում։

Նախարարը հավելեց, որ այս նախաձեռնությամբ կառավարությունը ձգտում է բարձր տեխնոլոգիական արդյունաբերությունը դարձնել գիտահեն տնտեսության հիմնասյուներից մեկը։