Իսլանդիան վճռականորեն աջակցում է Հայաստանի եվրոպական նկրտումներին և ողջունում է ավելի խորը համագործակցությունը

Իսլանդիայի ԱԳ նախարար Թորգերդուր Կատրին Գուննարսդոտիրը ՀՀ արտգործնախարար Արարատ Միրզոյանի հետ երկկողմ հարաբերությունների վերաբերյալ լավ քննարկում է ունեցել՝ խոսելով նաև եվրոպական համագործակցության և մարդու իրավունքների, ժողովրդավարության և օրենքի գերակայության արժեքների շուրջ համախմբվելու կարևորության մասին։ «Արմենպրես»-ի հաղորդմամբ՝ Իսլանդիայի արտգործնախարարն այդ մասին գրառում է կատարել X հարթակի իր էջում։

Good discussion with @AraratMirzoyan on 🇮🇸🇦🇲 bilateral relations, European cooperation and the importance of uniting around the values of human rights, democracy and the rule of law. Iceland firmly supports Armenia’s European aspirations and welcomes deeper cooperation. pic.twitter.com/UZ89pHNcBh

— Þorgerður Katrín Gunnarsdóttir (@thorgkatrin) February 25, 2025

«Իսլանդիան վճռականորեն աջակցում է Հայաստանի եվրոպական նկրտումներին և ողջունում է ավելի խորը համագործակցությունը»,- ասել է Գուննարսդոտիրը ։

Փետրվարի 25-ին Ժնև աշխատանքային այցի շրջանակներում ՀՀ ԱԳ նախարար Արարատ Միրզոյանը հանդիպում է ունեցել Իսլանդիայի ԱԳ նախարար Թորգերդուր Կատրին Գուննարսդոտիրի հետ։ 

ՀՀ ԱԳ նախարարությունն ավելի վաղ տարածել էր հաղորդագրություն՝ նշելով է, որ Հայաստանի և Իսլանդիայի արտգործնախարարները քննարկել են երկկողմ քաղաքական երկխոսության ընդլայնման, տարբեր ձևաչափերով և հարթակներում Հայաստանի և Իսլանդիայի միջև փոխգործակցության հեռանկարները։ Անդրադարձ է կատարվել առաջիկա հնարավոր այցելություններին։

«Նորդիկ-բալթյան երկրների հետ համագործակցության խորացման ակտիվ դինամիկան վկայում է մեր կողմից այս ձևաչափով փոխգործակցությանը տրվող կարևորության մասին, և մենք պատրաստակամ ենք համատեղ ջանքերով առավելագույնս օգտագործել առկա հնարավորությունները՝ թե՛ երկկողմ ոլորտային համագործակցության, թե՛ տարածաշրջանային փոխգործակցության համատեքստում»,- ասել է Արարատ Միրզոյանը։  

Արարատ Միրզոյանն իր գործընկերոջը ներկայացրել է ՀՀ-ԵՄ գործընկերության խորացման ուղղությամբ իրականացվող ջանքերը՝ կարևորելով Իսլանդիայի՝ որպես ԵՄ-ի մերձավոր գործընկերոջ հետ փորձի փոխանակումն ու կոնկրետ ուղղություններով կարողությունների ամրապնդումը։

Հանդիպմանն անդրադարձ է կատարվել միջազգային ու տարածաշրջանային զարգացումներին։ Երկուստեք ընդգծվել է միջազգային իրավունքի հիմնարար նորմերի հարգման և միավորող արժեքային համակարգի հիման վրա փոխգործակցության կարևորությունը։

ՀՀ ԱԳ նախարարը ներկայացրել է նաև Հարավային Կովկասում անվտանգային իրավիճակը և կայուն խաղաղության հաստատման ուղղությամբ ՀՀ ջանքերը։