Դաշտենցի անվան դպրոցի սովորողները հաղորդակցվել են Հայաստանում հունական համայնքի մշակութային կյանքին
2 րոպեի ընթերցում
Հայաստանում ապրող այլազգիների մշակույթի հանրահռչակմանն ուղղված՝ Կրթության, գիտության, մշակույթի և սպորտի նախարարության և Լեզվի կոմիտեի համատեղ ծրագրի շրջանակում Երևանի Խ.Դաշտենցի անվան 114 ավագ դպրոցի 10-րդ և 11-րդ դասարանների սովորողներն այցելել են ՀՀ վարչապետի աշխատակազմի ազգային փոքրամասնությունների կրթամշակութային կենտրոն։
Սովորողներին ընդունել է ՀՀ վարչապետի աշխատակազմի ազգային փոքրամասնությունների կրթամշակութային կենտրոնի ղեկավար Ավագ Հակոբյանը։
Սովորողները հանդիպում-զրույց են ունեցել նաև Հայաստանում հունական համայնքի ղեկավար Էդուարդ Միխայլովի հետ։ Միխայլովը մեծապես կարևորել է նման միջոցառումների անհրաժեշտությունը՝ նշելով, որ թե հայերի, թե հույների ճակատագրերը նման են, իսկ մշակութային առնչությունները՝ վառ արտահայտված: Այդ իմաստով նման շփումները փոխճանաչման հիմքն են ու կապերի ամրապնդման գրավականը: Նա սովորողներին մանրամասն ներկայացրել է հունական համայնքի գործունեության առանձնահատկությունները:
Ավագ Հակոբյանը տեղեկացրել է, որ ՀՀ վարչապետի աշխատակազմի ազգային փոքրամասնությունների կրթամշակութային կենտրոնում անցկացվում են ազգային փոքրամասնությունների լեզուների անվճար ուսուցում:
Երևանի Խ.Դաշտենցի անվան թիվ 114 ավագ դպրոցի սովորողները ծանոթացել են կրթամշակութային կենտրոնում գործող ազգային այլ փոքրամասնությունների մշակույթին, պատմությանը։
Հունական համայնքի ներկայացուցիչների գլխավորությամբ սովորողները պատրաստել են հունական ազգային կերակրատեսակներից՝ ձաձիկի։