Կտեղափոխվեմ այն քաշային կարգ, որը կլինի օլիմպիական. Գոռ Սահակյան

Հայաստանի ծանրամարտի առաջնության ու Եվրոպայի կրկնակի չեմպիոն, աշխարհի առաջնության բրոնզե մեդալակիր, ծանրորդ Գոռ Սահակյանն ապրիլին կայանալիք Եվրոպայի առաջնությունից հետո կտեղափոխվի նոր քաշային կարգ, որը կլինի օլիմպիական:

«Մարզավիճակս գնահատում եմ մոտավորապես 70 տոկոսով պատրաստ: Քանի որ աշխարհի առաջնությունից հետո մեկ հավաք ենք անցկացրել, գերազանց մարզավիճակում չէի: Սակայն բավարար էին այն կիլոգրամները, որոնք բարձրացրեցի: Քիչ-քիչ հարմարվում եմ նոր քաշային կարգին, բայց Եվրոպայի առաջնությունից հետո քաշային կարգերը նորից փոխվելու են` ամենայն հավանականությամբ, 73 կգ կդառնա 71 կգ»,- «Արմենպրես»-ի հաղորդմամբ` լրագրողների հետ զրույցում ասաց Սահակյանը:

Վերջինիս խոսքով` միայն Եվրոպայի առաջնությունից հետո ինքը վերջնականապես կհստակեցնի քաշային կարգը, որը պետք է որոշի մարզիչների հետ համատեղ: 

«Կտեղափոխվեմ այն քաշային կարգ, որը կլինի օլիմպիական: Քաշային կարգ չփոխելու ուրիշ տարբերակ չունենք: Ամեն ինչ կանեմ, բոլոր սխալներս կուղղեմ»,-նշեց Հայաստանի չեմպիոնը:

Ծանրորդ Գոռ Սահակյանը 2023, 2024 թվականների Եվրոպայի առաջնությունների չեմպիոն է, 2023 թվականի աշխարհի առաջնության բրոնզե մեդալակիր: