2 րոպեի ընթերցում
«Արտավազդ» թատերական մրցանակաբաշխությունը, որն ավանդույթի համաձայն այցկացվում է Թատրոնի միջազգային օրը՝ մարտի 27-ին, 2025-ին կանցկացվի Կապանում։
«Արմենպրես»-ի հաղորդմամբ՝ այս մասին հայտնում է Հայաստանի թատերական գործիչների միությունը։
Հաղորդագրության մեջ ասվում է, որ օրերս Հայաստանի թատերական գործիչների միության նախագահ Հակոբ Ղազանչյանը և Կապանի Ալ. Շիրվանզադեի անվան թատրոնի տնօրեն Տիգրան Աթայանը հանդիպել են Սյունիքի մարզպետ Ռոբերտ Ղուկասյանի հետ և նման որոշում կայացրել։
Շեշտվում է, որ Հայաստանի թատերական գործիչների միությունը միշտ առանձնահատուկ ուշադրության է արժանացրել մարզային թատերական կյանքը և, հաշվի առնելով այն փաստը, որ այս տարի լրանում է Կապանի Ալ. Շիրվանզադեի անվան թատրոնի 90-ամյակը, որոշում էր կայացվել դիմել ՀՀ Սյունիքի մարզպետարան՝ ՀԹԳՄ «Արտավազդ» մրցանակաբաշխությունը Կապանում անցկացնելու և այն թատրոնի հոբելյանին նվիրելու առաջարկով:
«Ուրախությամբ պետք է նշենք, որ առաջարկը մեծ ոգևորությամբ ընդունվեց մարզպետի կողմից: Ավելին, մրցանակաբաշխությանը նախորդող օրերին՝ մարտի 20–ից 26-ը կանցկացվի Կամերային ներկայացումների փառատոն, որի ընթացքում Կապանում հանդես կգան հանրապետության լավագույն թատերական կոլեկտիվները: Կասկած չունենք, որ թե´ մրցանակաբաշխությունը, և թե´ փառատոնը կխթանեն տեղի թատերական կյանքը՝ հանդիսատեսին էլ ավելի կապելով թատրոնին»,-ասվում է տեքստում։