ԱՄՆ-ի, Ճապոնիայի, Հնդկաստանի և Ավստրալիայի արտգործնախարարները QUAD ձևաչափով հանդիպում են անցկացրել
2 րոպեի ընթերցում
ԱՄՆ պետքարտուղար Մարկո Ռուբիոն և Ավստրալիայի, Հնդկաստանի ու Ճապոնիայի արտաքին գործերի նախարարությունների ղեկավարներ Փենի Վոնգը, Սուբրամանյամ Ջայշանկարը և Տակեսի Իվայան Վաշինգտոնում հանդիպում են անցկացրել անվտանգությանը նվիրված քառակողմ երկխոսության (QUAD) ձևաչափով: «Արմենպրես»-ի փոխանցմամբ՝ այս մասին հաղորդում է ԱՄՆ պետքարտուղարությունը:
Չորս երկրների արտաքին քաղաքական գերատեսչությունների ներկայացուցիչները հաստատել են իրենց «ընդհանուր հանձնառությունը՝ ամրապնդելու ազատ և բաց Հնդկախաղաղօվկիանոսյան տարածաշրջանը, որտեղ պահպանվում և պաշտպանվում են օրենքի գերակայությունը, ժողովրդավարական արժեքները, ինքնիշխանությունը և տարածքային ամբողջականությունը»:
«Մենք հանձնառու ենք ամրապնդելու տարածաշրջանային ծովային, տնտեսական և տեխնոլոգիական անվտանգությունն աճող սպառնալիքների պայմաններում, ինչպես նաև զարգացնելու հուսալի և կայուն մատակարարումների շղթաներ», - հայտարարել են նրանք:
Նշվում է, որ նման հանդիպումներ կանցկացվեն կանոնավոր կերպով՝ նախապատրաստվելու «քառյակի» ղեկավարների հաջորդ գագաթնաժողովին, որը կանցկացվի Հնդկաստանում։
Բացի այդ, Մարկո Ռուբիոն առանձին հանդիպումներ է անցկացրել Ավստրալիայի, Հնդկաստանի և Ճապոնիայի իր գործընկերների հետ։ Շեշտվել է վերոնշյալ երկրների հետ տարբեր ոլորտներում երկկողմ հարաբերություններն ամրապնդելու անհրաժեշտությունը։
Հանդիպումները տեղի են ունեցել ԱՄՆ նորընտիր նախագահ Դոնալդ Թրամփի երդմնակալության հաջորդ օրը՝ հունվարի 21-ին։