Նեթանյահուն հայտարարել է Գազայում հրադադարի համաձայնության հասնելու մասին՝ վերջին պահին առաջացած որոշ խոչընդոտներից հետո

Իսրայելի վարչապետ Բենիամին Նեթանյահուն հայտարարել է, որ հաջողվել է հասնել Գազայի հատվածում հրադադարի և պատանդների վերադարձի վերաբերյալ համաձայնության։ Այս հայտարարությունից առաջ Նեթանյահուի գրասենյակը հաղորդել էր, որ հրադադարի գործարքը վերջնականացնելու համար վերջին պահին որոշ խոչընդոտներ են առաջացել։ «Արմենպրես»-ի փոխանցմամբ՝ այս մասին հաղորդում է The Associated Press գործակալությունը։ 

Նեթանյահուն հայտարարել է, որ հունվարի 17-ի երկրորդ կեսին նիստ կգումարի իր անվտանգության կաբինետի, այնուհետև կառավարության անդամների հետ, որպեսզի նրանք հաստատեն երկար սպասված համաձայնագիրը։ 

Իսրայելը համաձայնագիրը պետք է հաստատեր հունվարի 16-ին, սակայն հետաձգել էր այդ հարցի շուրջ քվեարկությունը՝ պաղեստինյան ՀԱՄԱՍ շարժմանը մեղադրելով վերջին պահին համաձայնագրի որոշ կետերից հրաժարվելու մեջ՝ փորձելով ավելի զիջումներ ստանալ։ ՀԱՄԱՍ-ը հերքել է այս մեղադրանքները՝ հայտարարելով, որ «հանձնառու է մնում հրադադարի այն համաձայնագրին, որի մասին հայտարարել են միջնորդները»։ 

Հրադադարի մասին համաձայնության հասնելուց հետո իսրայելական  ուժերը շարունակել են ավիահարվածները պաղեստինյան անկլավին։ Reuters-ը, վկայակոչելով տեղի իշխանություններին, հայտնել է, որ իսրայելական հարվածներից Գազայի հատվածում հունվարի 16-ին առնվազն 86 մարդ է զոհվել։

Հրադադարի համաձայնագիրը պետք է ուժի մեջ մտնի հունվարի 19-ին։ Այն բաղկացած է երեք փուլից, որի առաջին փուլը կտևի 6 շաբաթ։ Այդ ընթացքում կվերադարձվի ՀԱՄԱՍ-ի մոտ պահվող 98 պատանդներից 33-ը։ Դրա դիմաց, ըստ որոշ լրատվամիջոցների, Իսրայելն ազատ կարձակի 1000 պաղեստինցի բանտարկյալների։ Որոշ լրատվամիջոցներ նշում են, որ այդ բանտարկյալների թիվը կկազմի 2000:

Մերձավոր Արևելքում իրադրությունը սրվել էր 2023 թ. հոկտեմբերի 7-ին ՀԱՄԱՍ-ի հարձակումից հետո, որի հետևանքով Իսրայելում զոհվել է 1200 մարդ, գերեվարվել՝ 251 մարդ։ Նրանց մի մասը վերադարձվել է 2023 թ. նոյեմբերին հաստատված մեկշաբաթյա հրադադարի ընթացքում։ Դրա դիմաց Իսրայելը ՀԱՄԱՍ-ին է վերադարձրել 240 պաղեստինցի բանտարկյալի։

Իսրայելի պատասխան ռազմական գործողությունների հետևանքով Գազայի հատվածում զոհերի թիվը գերազանցել է 46 600-ը։