1 րոպեի ընթերցում
Հայաստանում առաջին անգամ ուժային միջոցների կիրառման ստանդարտ է ներդրվում։
«Արմենպրես»-ի հաղորդմամբ՝ այս մասին ասուլիսի ժամանակ հայտարարեց ՀՀ ներքին գործերի նախարար Արփինե Սարգսյանը։
Նախարարն ընդգծեց, որ այս նախաձեռնությունը հնարավոր դարձավ ոստիկանության գվարդիայի մասին օրենքի ընդունման շնորհիվ։ Օրենքն ուղղված է հասարակական կարգի և անվտանգության ապահովմանը, ինչպես նաև հավաքների ազատության իրավունքների երաշխավորմանը՝ նոր մեթոդաբանությամբ։
«Ստանդարտ, որը երբեք Հայաստանում ճշգրիտ ձևակերպված չի եղել։ Իհարկե, ստանդարտի ներդրման աշխատանքները բավական բարդ և ծավալուն պրոցեսներ են ենթադրում, բայց մենք ստանձնում ենք այդ հանձնառությունը, որպեսզի, ի վերջո, Հայաստանի Հանրապետությունում հատկապես ոստիկանության աշխատանքների մասով կարողանանք այս ուժային միջոցի գործադրման ստանդարտը ներդնել և հետևողականորեն ապահովել նաև ստանդարտին համահունչ պրակտիկայի գործարկումը»,- ասաց Սարգսյանը։