2 րոպեի ընթերցում
Գեղարքունիքի մարզի Սևան համայնքի և ԱՄՆ «Հայ դպրոց» հիմնադրամի համագործակցության արդյունքում 2025 թվականին ևս Սևանի դպրոցները կապահովվեն անհրաժեշտ նոր գույքով։
Ինչպես «Արմենպրես»-ին տեղեկացրին Սևանի համայնքապետարանի աշխատակազմից, տարիներ շարունակ «Հայ դպրոց» հիմնադրամի կողմից իրականացվող բարեսիրական ծրագրերի շահառուներ են դարձել Սևան համայնքի նախակրթական և հանրակրթական ուսումնական հաստատությունները, որոնք համալրվել են անհրաժեշտ նոր գույքով։
Հիմնադրամի առատաձեռնությունը 2025 թվականին էլ ունենալու է շարունակություն:
Սևանի տարածաշրջանում հիմնադրամի աշխատանքները համակարգող, «Սևան» թերթի խմբագիր Պապ Հայրապետյանի փոխանցմամբ՝ հիմնադրամում արդեն հաստատվել է այն հաստատությունների ցանկը, որոնք այս տարի կստանան նվիրատվություն։
Լոս-Անջելեսից ստացված տեղեկատվության համաձայն՝ լիովին կփոխվի Սևանի Յակով Զարուբյանի անվան թիվ 2 դպրոցի գույքը։
Նոր գույք կստանա Ծովագյուղի միջնակարգ և Սևանի Վլ. Կարապետյանի անվան հիմնական դպրոցների երկու դասարան, Գագարինի միջնակարգ դպրոցում մեկ դասարան կթարմացվի նոր գույքով։
Նոր գույք ստացողների ցանկում է նաև Սևան քաղաքի «Բոժոժիկ» մսուր-մանկապարտեզը։ Դպրոցական պահարաններ, ուսուցչական սեղան-աթոռներ կստանան Գեղամավանի և Սևանի թիվ 6 միջնակարգ դպրոցները։
Տարվա ընթացքում նոր գույք կստանա նաև Սեմյոնովկա բնակավայրի դպրոցը, որի հայտը քննարկման փուլում է։