3 րոպեի ընթերցում
ԵՐԵՎԱՆ, 10 ՀՈՒՆՎԱՐԻ, ԱՐՄԵՆՊՐԵՍ: Արվեստագետները, պետական պաշտոնյաները, կինոյի երկրպագուները հունվարի 9-ին հանդիսավորությամբ նշել են կինոռեժիսոր, վավերագրող, Հայաստանի ժողովրդական արտիստ, Հայաստանի կինոգործիչների միության նախագահ, «Ոսկե ծիրան» միջազգային կինոփառատոնի հիմնադիր, Եվրոպական կինոակադեմիայի անդամ, Հայաստանում կինոարվեստի ոլորտի զարգացման գործում նշանակալի ավանդ ունեցող, միջազգային բազմաթիվ հեղինակավոր կինոփառատոների մրցանակակիր Հարություն Խաչատրյանի ծննդյան 70-ամյակը։
«Արմենպրես»-ի հաղորդմամբ՝ Կինոյի տանը կազմակերպված միջոցառմանը ՀՀ ԿԳՄՍ նախարար Ժաննա Անդրեասյանը շնորհավորել է Հարություն Խաչատրյանին, շնորհակալություն հայտնել կինոյի ոլորտում ծավալած գործունեության համար։
«Այն, ինչ ունենք կինոյի ոլորտում, մեծ չափով պայմանավորված է նաև Ձեր գործունեությամբ, որն անպայմանորեն պետք է շարունակական լինի։ Ինչպես ֆրանսիացի փիլիսոփա Դերիդան է ասում՝ բառերը փախչող լռություն ունեն, որը կարողանում է բռնել միայն կինոն։ Հենց այս լռությունն էլ բնորոշ է նաև Ձեր կինոյին, որը զգայական մակարդակում հարստացնում է լուռ պատկերների ներկապնակը»,-նշել է Անդրեասյանը։
Նախարարը բարձր է գնահատել վարպետի ներդրումը փառատոնային մշակույթը դժվար ժամանակներում Հայաստան բերելու խիզախության և այդպիսով Հայաստանը ճանաչելի դարձնելու և կինոարտադրության զարգացմանը նպաստելու համար։
««Ոսկե ծիրանը» նոր մշակույթ էր հայ իրականության մեջ։ Ուզում եմ կարևորել և ընդգծել այն հանգամանքը, որ քչերին է վիճակված «սեփական ժառանգին» բաց թողնելու կամքը։ Ի դեմս «Ոսկե ծիրանի»՝ Դուք, այն ազատ թողնելով, հանձնեցիք երիտասարդներին՝ դրանով իսկ նպաստելով փառատոնի զարգացմանը։ Սա արժանի է ամենաբարձր գնահատանքին»,-ասել է նախարարը և հավելել, որ ԿԳՄՍ նախարարությունը մշտապես պատրաստակամ է աջակցելու նոր ծրագրերի իրագործմանը և կինոյի զարգացմանը։ Նախարարը Հարություն Խաչատրյանին մաղթել է առողջություն և ստեղծագործական գործունեությունը շարունակելու եռանդ։
Միջոցառման ընթացքում ցուցադրվել են ինչպես Հարություն Խաչատրյանի հեղինակային, այնպես էլ նրա մասին պատմող ֆիլմեր։