ՀՀ ԱԳՆ-ն ցավակցություն է հայտնել Նոր Օռլեանում ողբերգական միջադեպի զոհերի հարազատներին ու ԱՄՆ կառավարությանը
1 րոպեի ընթերցում
ԵՐԵՎԱՆ, 3 ՀՈՒՆՎԱՐԻ, ԱՐՄԵՆՊՐԵՍ։ Հայաստանի Հանրապետության արտաքին գործերի նախարարությունը ցավակցություն է հայտնել Նոր Օռլեանում Ամանորին տեղի ունեցած ողբերգական միջադեպի զոհերի հարազատներին և ԱՄՆ կառավարությանը։
«Արմենպրես»-ի հաղորդմամբ՝ ՀՀ արտգործնախարարությունը ցավակցական գրառումը տարածել է X-ի միկրոբլոգում։
«Մենք խորը ցավով տեղեկացանք Նոր Օռլեանում ողբերգական իրադարձությունների մասին։ Դատապարտում ենք բռնության այսպիսի անիմաստ գործողությունները և մեր խորին ցավակցությունն ենք հայտնում զոհերի հարազատներին և ԱՄՆ կառավարությանը»,-ասված է ՀՀ ԱԳՆ գրառման մեջ։
Ավելի վաղ հայտնի է դարձել, որ ԱՄՆ Նոր Օռլեան քաղաքում ամենագնացը մխրճվել է Ամանորը տոնող մարդկանց խմբի մեջ, ինչի հետևանքով կա 10 զոհ և 30 վիրավոր:
Դեպքը տեղի է ունեցել քաղաքի ֆրանսիական թաղամասում գտնվող պատմական Բուրբոն փողոցում, որը հայտնի զբոսաշրջային հատված է՝ բազմաթիվ բարերով և ռեստորաններով: Ուստի Ամանորի գիշերը փողոցը մարդաշատ է եղել: