1 րոպեի ընթերցում
ԵՐԵՎԱՆ, 25 ԴԵԿՏԵՄԲԵՐԻ, ԱՐՄԵՆՊՐԵՍ: ՌԴ նախագահ Վլադիմիր Պուտինն ԱՊՀ երկրների ոչ պաշտոնական գագաթնաժողովում հայտարարել է, որ ԱՊՀ շրջանակներում գործընկերության խորացումը համապատասխանում է միավորման անդամ երկրների շահերին. նրանք այսուհետ էլ միասին կաշխատեն տարբեր խնդիրների լուծման համար։ «Արմենպրես»-ի փոխանցմամբ՝ այս մասին հաղորդում է ՏԱՍՍ-ը:
«Ընդհանուր առմամբ, համոզված եմ, որ Համագործակցության շրջանակներում գործընկերության խորացումն ամենատարբեր բնագավառներում համապատասխանում է մեր երկրների ժողովուրդների հիմնական շահերին: Եվ վստահ եմ՝ այսուհետ էլ միասին կաշխատենք սոցիալ-տնտեսական զարգացման, կայունության և անվտանգության ամրապնդման խնդիրների լուծման ուղղությամբ», - ասել է Ռուսաստանի ղեկավարը։
Պուտինը նաև հաջողություններ է մաղթել Տաջիկստանի նախագահ Էմոմալի Ռահմոնին՝ 2025 թվականին ԱՊՀ-ի նախագահությունն այդ երկրին փոխանցելու առթիվ։
«Օգտվելով առիթից՝ կխնդրեի իմ ամենասրտանց շնորհավորանքները հայտնել գալիք Ամանորի առթիվ և քաջառողջության, երջանկության, բարեկեցության և բարգավաճման մաղթանքները՝ ձեր պետությունների քաղաքացիներին»,- դիմել է Պուտինն ԱՊՀ անդամ երկրների ղեկավարներին: