Նիկոլ Փաշինյանը ՀՀ նախկին նախագահներին ԼՂ հակամարտության թեմայով բանավեճի առաջարկ է արել
1 րոպեի ընթերցում
ԵՐԵՎԱՆ, 23 ԴԵԿՏԵՄԲԵՐԻ, ԱՐՄԵՆՊՐԵՍ։ Հայաստանի վարչապետ Նիկոլ Փաշինյանը Լեռնային Ղարաբաղի հակամարտության թեմայով բանավեճի առաջարկ է արել Հայաստանի նախկին նախագահներին։
«Արմենպրես»-ի փոխանցմամբ՝ այս մասին Փաշինյանը գրել է «Ֆեյսբուք»-ի իր էջում։
«Լավ է, որ նախկին նախագահները իրենց ներկայացուցիչների միջոցով արձագանքել են ԼՂ բանակցային գործընթացին վերաբերվող իմ այսօրվա գրառմանը: Բայց ես ներկայացուցիչների ետեւում չեմ թաքնվում, կարծում եմ ճիշտ կլինի՝ իրենք էլ չթաքնվեն:
Պատրաստ եմ նախկին նախագահների հետ ուղիղ եթերում բանավեճի ֆորմատով հիմնավորել ասածներս: Սպասում եմ այսօրվա գրառումս վիճարկող նախագահների արձագանքին»,- գրել է Փաշինյանը:
Վարչապետ Նիկոլ Փաշինյանն ավելի վաղ «Ֆեյսբուք»-ի իր էջում գրել էր, որ Լեռնային Ղարաբաղի հակամարտության շուրջ բանակցությունները մեկնարկից ի վեր եղել են Լեռնային Ղարաբաղն Ադրբեջանի կազմ վերադարձնելու մասին։ Այդ գրառումից հետո ՀՀ նախկին նախագահների տարբեր թիմակիցներ քննադատել են վարչապետին՝ հերքելով նրա պնդումը։