Հայաստանը կունենա Արագ արձագանքման բժշկական խումբ, որը մարդասիրական առաքելություն կիրականացնի երկրում և երկրից դուրս
3 րոպեի ընթերցում
ԵՐԵՎԱՆ, 5 ԴԵԿՏԵՄԲԵՐԻ, ԱՐՄԵՆՊՐԵՍ: Հաաստանում կստեղծվի Արագ արձագանքման բժշկական խումբ, որն ըստ անհրաժեշտության մարդասիրական առաքելություն կիրականացնի ինչպես Հայաստանում, այնպես էլ տարբեր երկրներում:
«Արմենպրես»-ի հաղորդմամբ՝ «Բնակչության բժշկական օգնության եւ սպասարկման մասին» օրենքում լրացումներ և փոփոխություններ կատարելու մասին օրենքի նախագիծը երկրորդ ընթերցմամբ ընդունելու համար ԱԺ նիստում ներկայացրեց Առողջապահության փոխնախարար Լենա Նանուշյանը:
«Նախագծով առաջարկում ենք ստեղծել արագ արձագանքման բժշկական խումբ ՀՀ-ում, որը մարդասիրական առաքելություն կունենա: Եթե տարբեր երկրներում անհրաժեշտություն լինի, և կառավարության, վարչապետի կողմից որոշում կայացվի, որ պետք է մարդասիրական բժշկական խումբ ուղարկել այդ երկիր՝ մարդասիրական առաքելության համար, ապա այս խումբը կարող է մեկնել և տրամադրել համապատասխան օգնություն տուժած բնակչութանը»,-ասաց Նանուշյանը:
Այս խումբը պետք է լինի ինքնաբավ, այսինքն՝ պետք է ապահովված լինի և կադրերով՝ բուժաշխատողներով, լոգիստիկ մասնագետներով, և անհրաժեշտ բժշկական սարքավորումներով, սննդով, ջրով: «Այսինքն՝ խումբը պետք է լինի ինքնաբավ և ցանկացած արհավիրքի ժամանակ կարողանա ինքնուրույն բժշկական ծառայություններ մատուցել տուժած բնակչությանը»,-ասաց նա:
Խումբը պետք է աշխատի Առողջապահության համաշախարհային կազմակերպության ստանդարտներով: Խումբը պետք է ստանա միջազգային հավաստագիր: «Երբ խումբը ստանա միջազգային հավաստագիր, մեր հայաստանյան բժշկական թիմն էլ կկարողանա մեկնել մարդասիրական առաքելությունների այնպես, ինչպես տարբեր բժշկական թիմեր կորոնավիրուսային հիվանդության և պատերազմի ժամանակ այցելեցին Հայաստան և օգնեցին մեր բուժաշխատողներին բժշկական ծառայություններ տրամադրելու»,-ասաց Նանուշյանը:
Ըստ նախագծի՝ Արագ արձագանքման բժշկական խումբը Հայաստանի Հանրապետության տարածքից դուրս միջազգային մարդասիրական առաքելություններին ներգրավվում է Հայաստանի Հանրապետության վարչապետի որոշմամբ, իսկ Հայաստանի Հանրապետության տարածքում արտակարգ իրավիճակների ժամանակ տուժածներին բժշկական օգնություն եւ սպասարկում տրամադրելու աշխատանքներին ներգրավվում է Հայաստանի առողջապահության բնագավառի պետական կառավարման լիազոր մարմնի և ներքին գործերի բնագավառի պետական կառավարման լիազոր մարմնի ղեկավարների համատեղ հրամանով սահմանված կարգով: