Ազգային տինկնիկային թատրոնի «Բուկովսկի» ներկայացումը մրցանակի է արժանացել Իտալիայում

ԵՐԵՎԱՆ, 4 ԴԵԿՏԵՄԲԵՐԻ, ԱՐՄԵՆՊՐԵՍ: Ազգային տիկնիկային թատրոնը դեկտեմբերի 2-ին «Բուկովսկի» ներկայացմամբ  մասնակցել է 30th Premio Mecenate միջազգային փառատոնին՝ հանդես գալով Հռոմի «Ռոսսինի» թատրոնում և արժանացել է «Տարվա լավագույն ներկայացում» պատվավոր մրցանակին:

«Արմենպրես»-ի հաղորդմամբ՝ այս մասին հաղորդագրություն է հրապարակվել թատրոնի «Ֆեյսբուք»-ի պաշտոնական էջում:

«Ուրախությամբ հայտնում ենք, որ բացի իտալացի հանդիսատեսից, մեզ հետ էին նաև Իտալիայի Հանրապետությունում ՀՀ արտակարգ և լիազոր դեսպան Վլադիմիր Կարապետյանը, ինչպես նաև հայ համայնքի ներկայացուցիչներ»,-ասվում է տեքստում:

«Բուկովսկի» ներկայացումը՝ նախատեսված մեծահասակների համար, բեմադրել է Մարիետա Դովլաթբեկյանը: Ամերիկացի ականավոր բանաստեղծի կյանքի պատմությունը ներկայացնող բեմադրության առաջնախաղը տեղի է ունեցել Սլովակիայի մայրաքաղաք Բրատիսլավայում: