Podcast-ՍոցUp․ Ժողովրդագրական ռազմավարության նպատակներից է նաև արտագաղթի հանգեցնող դրդապատճառների նվազեցումը
2 րոպեի ընթերցում
ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ։ Հայաստանի ժողովրդագրական իրավիճակի բարելավման 2024-2040 թթ․ ռազմավարության նպատակներից է նաև էմիգրացիայի հանգեցնող դրդապատճառների նվազեցումը:
«Արմենպրես»-ի Podcast-ՍոցUp նախագծի շրջանակներում «Ամերիա» խորհրդատվական ծառայության ղեկավար Տիգրան Ջրբաշյանը կարծիք հայտնեց, որ առաջիկա տարիներին, Հայաստանի տնտեսական զարգացման մակարդակով պայմանավորված, արտագաղթը գերակշռելու է ներգաղթին։
«Հաշվի առնելով, որ արտագաղթը ներգաղթի համեմատ ավելի մեծ է լինելու՝ մենք առաջարկում ենք կենտրոնանալ այն սեռատարիքային խմբի վրա, որը պետության համար կարևոր է։ Պետք է հասկանալ՝ արդյոք այն երիտասա՞րդն է արտագաղթում, որը կարող էր մնալ և ամբողջ կյանքում ավելացված արժեք ստեղծել, թե՞ 50-60 տարեկան մարդիկ են գնում»,-ասաց Ջրբաշյանը՝ հավելելով, որ պետությունը պետք է արտագաղթի հետ կապված նպատակաուղղված քաղաքականություն իրականացնի՝ սահմանելով առաջնահերթություն, թե ո՞ր տարիքային խումբն է իր համար կարևոր։
Ինչ վերաբերում է ներգաղթին, ապա փորձագետի կարծիքով պետք է փորձել այնպիսի միջավայր ձևավորել, որպեսզի այդ գործընթացն ուղղված լինի մարդկային կապիտալի որակի զարգացմանը։
«Պետք է փորձենք մարդկային կապիտալի զարգացման համար ստեղծել այնպիսի միջավայր, որ թիրախային խումբ հանդիսացող մարդկանց համար այստեղ գալը ձեռնտու լինի»,-պարզաբանեց Ջրբաշյանը։
Այս նպատակներին հասնելու համատեքստում՝ նա կարևորեց միգրացիոն ռազմավարություն ունենալու խնդիրը։
Մանրամասները՝ փոդքասթում։
ՀՀ ժողովրդագրական իրավիճակի բարելավման 2024-2040 թթ․ ռազմավարությունը մշակվել է Աշխատանքի և սոցիալական հարցերի նախարարության կողմից՝ ՄԱԿ-ի Բնակչության հիմնադրամի հայաստանյան գրասենյակի աջակցությամբ և «Ամերիա» խորհրդատվական ընկերության հետ համագործակցությամբ․ գործընթացում ներգրավված են եղել համաշխարհային և առաջատար փորձագետներ, այդ թվում՝ Վիտգենշտայնի ժողովրդագրության և համաշխարհային մարդկային կապիտալի կենտրոնից և Պրահայի Չարլզի համալսարանից: