1 րոպեի ընթերցում
ԳԱՎԱՌ, 26 ՆՈՅԵՄԲԵՐԻ, ԱՐՄԵՆՊՐԵՍ։ Գեղարքունիքի մարզի Մարտունի համայնքի Ծովինար գյուղում ՀՀ կառավարության կողմից 2024 թվականին իրականացվող սուբվենցիոն ծրագրերի շրջանակներում մեկնարկել և ընթանում են մշակույթի տան դիմացի հրապարակի զբոսայգու կառուցման աշխատանքները։
Ինչպես «Արմենպրես»-ը տեղեկացավ Մարտունու համայնքապետարանի աշխատակազմից, Ծովինարի զբոսայգու կառուցման ծրագրի պայմանագրային արժեքը կազմում է 19 միլիոն դրամ, որի 65 տոկոսը հատկացնում է ՀՀ կառավարությունը, 35 տոկոսը՝ Մարտունու համայնքապետարանը։
Ծրագրով նախատեսված է Ծովինարի մշակույթի տան դիմացի հրապարակի սալիկապատում, կանաչապատում, ծառատնկում, ցայտաղբյուրի և լուսավորության համակարգի կառուցում, նստարանների տեղադրում։
Նոյեմբերի սկզբից մեկնարկած շինարարական աշխատանքներն արդեն իրականացվել են շուրջ 20 տոկոսով։
Շինաշխատանքները, որոնք իրականացնում է «ԱԼ-ՄԱՔ» ՍՊԸ-ն, նախատեսված է ավարտին հասցնել այս տարվա ընթացքում։