Սննդամթերքի և տնտեսական ապրանքների առևտրի ոլորտում բացահայտվել է շուրջ 603 մլն դրամի ստվերային շրջանառության դեպք
2 րոպեի ընթերցում
ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ: Բացահայտվել է շուրջ 603 մլն դրամի ստվերային շրջանառության դեպք։ «Արմենպրես»-ի փոխանցմամբ՝ այս մասին հայտնում են Հայաստանի պետական եկամուտների կոմիտեից՝ ներկայացնելով մանրամասներ:
«Օրերս ՊԵԿ հետաքննության և օպերատիվ հետախուզության վարչության տարածքային թիվ 13 բաժին օպերատիվ տվյալներ էին ստացվել այն մասին, որ Երևան քաղաքի Էրեբունի և Շենգավիթ վարչական շրջաններում, ինչպես նաև Կոտայքի մարզի Զովունի գյուղում գործող սննդամթերքի և տնտեսական ապրանքների առևտրով զբաղվող խանութների ցանցը, ապրանքներ վաճառելիս, չի տրամադրում ՀԴՄ կտրոններ, ինչպես նաև դուրս չի գրում համապատասխան հարկային հաշիվներ` այս կերպ խուսափելով խոշոր չափերի հարկեր վճարելուց։
Տվյալներն իրացնելու նպատակով` ձեռնարկվել են համակողմանի և մեծածավալ օպերատիվ-հետախուզական միջոցառումներ: Արդյունքում, ստացված օպերատիվ տվյալները հաստատվել են։
Միջոցառումների արդյունքում ձեռք են բերվել փաստական տվյալներ առ այն, որ ընկերությանը պատկանող խանութները 2023-2024 թվականների ընթացքում, գնորդներից գանձված գումարները չեն մուտքագրել հսկիչ-դրամարկղային մեքենա և թաքցրել են շուրջ 603 մլն դրամի իրացման շրջանառություն»,- նշված է ՊԵԿ-ի տարածած հաղորդագրության մեջ:
Ձեռք բերված փաստական տվյալների հիմքով կատարվել է պատճառված վնասի նախնական հաշվարկ, ըստ որի, պետությանը պատճառվել է շուրջ 165 մլն դրամի վնաս։
Դեպքի առթիվ հանցագործության հատկանիշներով հաղորդում է ներկայացվել ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչություն, որտեղ նախաձեռնվել է քրեական վարույթ: Քրեական վարույթի շրջանակում կատարվել են խուզարկություններ: Առգրավվել են վարույթի համար կարևոր նշանակություն ունեցող փաստաթղթեր, համակարգիչներ և էլեկտրոնային կրիչներ։
Ծանուցում. ենթադրյալ հանցանքի համար կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։