1 րոպեի ընթերցում
ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ: Սևանա լճի մակարդակը վերջին տվյալով նախորդ տարվա նույն ժամանակահատվածի նկատմամբ բարձր է 22 սմ-ով: «Արմենպրես»-ի փոխանցմամբ՝ այս մասին ասաց Շրջակա միջավայրի նախարար Հակոբ Սիմիդյանն ԱԺ մշտական հանձնաժողովների համատեղ նիստում 2025թ պետական բյուջեի մասին օրենքի նախագծի նախնական քննարկումներում:
Նախարարը նշեց, որ այս տարի Սևանից ոռոգման նպատակով 135 մլն խմ ջուր են բաց թողել: Դա վերջին 15 տարվա լավագույն ցուցանիշն է:
«Սևանի մակարդակը երեկվա տվյալներով նախորդ տարվա նույն օրվա նկատմամբ 22 սմ-ով բարձր է, իսկ 2024 թվականի հունվարի 1-ի համեմատ 28 սմ-ով է բարձր»,-ասաց Սիմիդյանը՝ սա համարելով ուրախացնող ցուցանիշ:
Նախարարությունը Սևանի ջրի որակի մոնիթորինգ է իրականացնում: «Փորձում ենք ամեն ինչ անել, որ Սևան կեղտաջրեր, աղբ չթափվի, թափվածն էլ մաքրվի»,-նշեց Հակոբ Սիմիդյանը: