1 րոպեի ընթերցում
ԵՐԵՎԱՆ, 31 ՀՈԿՏԵՄԲԵՐԻ, ԱՐՄԵՆՊՐԵՍ: Կ․ Պոլսի Հայոց Պատրիարք Ամենապատիվ Տ․ Սահակ արքեպիսկոպոս Մաշալյանը հոկտեմբերի 31-ին ժամանել է Մայր աթոռ Սուրբ Էջմիածին: «Արմենպրես»-ի փոխանցմամբ՝ Մայր աթոռի տեղեկատվական համակարգի տարածած հաղորդագրության մեջ նշվում է, որ առաջիկա օրերին Ամենապատիվ Սահակ պատրիարքն իր մասնակցությունը կբերի Մայր աթոռում գումարվելիք Գերագույն հոգևոր խորհրդի ժողովին:
Մայր աթոռ Սուրբ Էջմիածնի միաբանները Կ․ Պոլսի Հայոց պատրիարքին թափորով առաջնորդել են Քրիստոսահիմն Մայր Տաճար, ուր Իջման Սուրբ Սեղանի առջև կատարվել է «Հրաշափառի» արարողություն։
Ամենապատիվ պատրիարքին միաբանության անունից ողջունել և բարի գալուստ է մաղթել Մայր աթոռի լուսարարապետի պաշտոնակատար Հոգեշնորհ Տ․ Հարություն վարդապետ Կիրակոսյանը։
Այնուհետև Պոլսո Հայոց պատրիարքն իր օրհնությունն ու բարեմաղթանքներն է բերել Սուրբ Էջմիածնի միաբանությանն՝ ընդգծելով, որ հոգևոր մխիթարություն և օրհնություն է վերստին գտնվել Մայր աթոռ Սուրբ Էջմիածնում։
Վեհարանում տեղի է ունեցել Ն.Ս.Օ.Տ.Տ. Գարեգին երկրորդ Ծայրագույն պատրիարք և Ամենայն Հայոց կաթողիկոսի և Պոլսո Հայոց պատրիարքի առանձնազրույցը: