1 րոպեի ընթերցում
ԳՅՈՒՄՐԻ, 26 ՀՈԿՏԵՄԲԵՐԻ, ԱՐՄԵՆՊՐԵՍ: «Գյումրու ժողովրդական ճարտարապետության և քաղաքային կենցաղի» թանգարանում բացվեց Հայաստանում Չեխիայի դեսպանության կողմից կազմակերպված չեխական ավանդույթների լուսանկարների ցուցահանդեսը։ Ինչպես տեղեկացնում է «Արմենպրես»-ը, միջոցառումն ուղեկցվեց Չեխիայի անկախության օրվան նվիրված համերգային ծրագրով։
Միջոցառման մասնակիցներին ողջունեց ՀՀ-ում Չեխիայի արտակարգ և լիազոր դեսպան Պետր Պիրունչիկը` նշելով, որ չեխական ավանդույթների մասին պատմող լուսանկարների հեղինակը չեխ հայտնի լուսանկարիչ Աժբեդա Յունգրովան է։ «Վերջինս լուսանկարների շարքով փորձել է ներկայացնել չեխերի սովորույթները, տոները, ծեսերն ու ավանդույթները»,-նշեց ՀՀ-ում Չեխիայի արտակարգ և լիազոր դեսպանը։
ՀՀ Շիրակի մարզպետ Մուշեղ Մուրադյանի անունից ներկաներին ողջունեց մարզպետի աշխատակազմի Կրթության, մշակույթի և սպորտի վարչության պետի պարտականությունները կատարող Վաչագան Վարդանյանը՝ շնորհավորեց Չեխիայի անկախության օրվա առթիվ, կարևոր համարելով երկու երկրների միջև երկկողմ, ապակենտրոնացված համագործակցությունը, որին նպաստում են այսօրինակ միջոցառումները։
Ցուցահանդեսը բաց է մինչև դեկտեմբերի 29-ը: