Տեղի ունեցավ գեղանկարիչ Մեխակ Էլբակյանի ստեղծագործական կյանքը ներկայացնող ցուցահանդես ու պատկերագրքի շնորհանդես
3 րոպեի ընթերցում
ԵՐԵՎԱՆ, 11 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի նկարիչների միությունում տեղի ունեցավ անվանի գեղանկարիչ Մեխակ Էլբակյանի ստեղծագործական ուղին ներկայացնող «Կես դար» խորագրով ցուցահանդեսի բացումն ու պատկերագրքի շնորհանդեսը:
«Արմենպրես»-ի հաղորդմամբ` Նկարիչների միության «Մարտիրոս Սարյան» ցուցասրահում բացված ցուցահանդեսն ընդգրկում է Մեխակ էլբակյանի ինչպես տարբեր տարիների, այնպես էլ նոր ստեղծագործություններ, որոնք զետեղված են նաև նրա ստեղծագործական կեսդարյա ուղին ներկայացնող պատկերագրքում:
Հայաստանի նկարիչների միության նախագահ Սուրեն Սաֆարյանը բարձր գնահատեց Մեխակ Էլբակյանի արվեստը՝ նշելով, որ նա ստեղծագործում է իրեն հուզող թեմաներով և անդրադառնում գեղանկարչական արվեստի գրեթե բոլոր ճյուղերին:
«Նրա ստեղծագործությունների մեջ մենք կարող ենք տեսնել սեր, պայքար, վիշտ: Ի դեմս նրա՝ գործ ունենք շատ հետաքրքիր արվեստագետի հետ: Ուրախ եմ, որ այսօր «Մարտիրոս Սարյան» ցուցասրահում բացում ենք նաև իր ցուցահանդեսը և ցուցադրվում են վերջին տարիների իր աշխատանքները»,-հավելեց Սաֆարյանը:
Նա ընդգծեց, որ ի կես դարը հատած գեղանկարիչն իր կյանքի մեծ հատվածը նվիրել է Հայաստանի գեղարվեստի պետական ակադեմիային, որտեղ նա նվիրումով դասավանդում է երկար տարիներ, կրթում մատաղ սերնդին:
Անդրադառնալով պատկերագրքին, Նկարիչների միության նախագահը կարևորեց դրա նշանակությունը՝ համոզմունք հայտնելով, որ արվեստագետի ստեղծածը մնայուն է դառնում նաև գրքում դրոշմվելով:
Մեխակ Էլբակյանի խոսքով՝ ցուցահանդեսին ներկայացված են պատկերագրքում զետեղված նկարների մի մասը:
«Ներկայացված են նաև նոր աշխատանքներ, որոնք առաջին անգամ կտեսնեն արվեստասերները: Շատ ասելիք կա և փիլիսոփայական այն մտքերը, հույզերը, ինչ փորձել եմ տեղ հասցնել, արվեստասերը կծանոթանա ու կհաղորդակցվի այդ ամենի հետ»,-ասաց գեղանկարիչը՝ մանրամասնելով, որ պատկերագրքում էլ ներկայացվել են ստեղծագործական տարիները, սկսած՝ նկարչական դպրոցից:
Ավելի քան 350 էջանոց պատկերագրքում ներկայացված են տեղեկություններ նրա ստեղծագործական կյանքի շրջափուլերի մասին, ինչպես նաև տարբեր ժանրերի ստեղծագործությունները՝ գեղանկարչություն, դիմանկարչություն, բնանկարչություն, գծանկարներ, էսքիզներ և այլն:
«Փորձել ենք բովանդակային, ծավալուն կենսագրական ու ստեղծագործական գործունեության վերաբերյալ գիրք ստեղծել: Գրքում զետեղված են նույնիսկ առաջին վրձնի գործերը: Փորձել եմ տեսնել շատ հետաքրքիր այդ ընթացքը, զարգացումներն ու ապրումները»,-ասաց Էլբակյանը:
Պատկերագիրքը նաև ուսուցողական նշանակություն ունի և նախատեսված է ուսանողների, գեղանկարչությամբ հետաքրքրվողների, արվեստասեր լայն հանրության համար: