Մարմաշեն բնակավայրում բացվել է երիտասարդական կենտրոն

ԳՅՈՒՄՐԻ, 9 ՀՈԿՏԵՄԲԵՐԻ,  ԱՐՄԵՆՊՐԵՍ: Շիրակի մարզի Ախուրյան համայնքի Մարմաշեն բնակավայրում բացվել է երիտասարդական կենտրոն: Այն Մարմաշենում առաջինն է և ծառայելու է ոչ միայն Մարմաշենի, այլև Ախուրյան խոշորացված համայնքի մյուս բնակավայրերի բնակիչներին: Այն հագեցած է ժամանակակից գույքով և սարքավորումներով։ 

Կենտրոնը նպատակ ունի համախմբելու համայնքային երիտասարդությանը՝ կրթական նոր հնարավորություններ և ժամանցի նոր տարբերակներ առաջարկելով:

Կենտրոնի ստեղծման նախաձեռնությունը «Պանդո» համայնքային զարգացման հասարակական կազմակերպությանն էր, իսկ գաղափարը իրականություն է դարձել LEAD4Shirak ծրագրի շրջանակում՝ Եվրոպական միության և Ավստրիական զարգացման համագործակցության ֆինանսավորմամբ, «Կենտրոնական Շիրակ» տեղական ակտիվ խմբի և Ախուրյանի համայնքապետարանի աջակցությամբ:

«Այս նոր կենտրոնը կդառնա բաց հարթակ՝ ծառայելով Մարմաշեն, Վահրամաբերդ և Կապս գյուղերի երեխաներին, երիտասարդներին և համայնքի բնակիչներին: Այն կդառնա ոչ միայն երիտասարդների, այլև երեխաների և մեծահասակների համար տարաբնույթ զարգացման ծրագրերի իրականացման, նոր ու հետաքրքիր գաղափարների ստեղծման միջավայր»,- «Արմենպրես»-ի թղթակցի հետ զրույցում նշեց «Պանդո» համայնքային զարգացման հասարակական կազմակերպության ղեկավար Անդրանիկ Պապոյանը:

LEAD4Shirak ծրագիրը, Եվրոպական միության և Ավստրիական զարգացման համագործակցության աջակցությամբ, միայն Ախուրյանում իրականացրել է 30 խոշոր նախագիծ՝ համայնքային և բիզնես ծրագրերում ներդնելով շուրջ 200 միլիոն դրամ:

Արմենուհի Մխոյան