Երևանի էներգաարդյունավետության ծրագրի առաջին փուլով հիմնանորոգվել են Աջափնյակի հ. 36 և Մալաթիայի հ. 81 մսուր-մանկապարտեզները
1 րոպեի ընթերցում
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Երևանի էներգաարդյունավետության ծրագրի առաջին փուլով հիմնանորոգվել են Աջափնյակ վարչական շրջանի հ. 36 և Մալաթիա վարչական շրջանի հ. 81 մսուր-մանկապարտեզները։
Ինչպես «Արմենպրես»-ին տեղեկացրին Երևանի քաղաքապետարանից, 2021 թվականին մեկնարկած Երևանի էներգաարդյունավետության ծրագրի առաջին փուլով նախատեսված էր 50 մանկապարտեզի հիմնանորոգում, վերակառուցում և սեյսմիկ վերազինում:
«Աջափնյակ վարչական շրջանի հ. 36 և Մալաթիա վարչական շրջանի հ. 81 մսուր-մանկապարտեզները հիմնանորոգվել են այս ծրագրով: Այժմ փոքրիկները հաճախում են նոր ու անվտանգ շենքային պայմաններ ունեցող նախակրթարաններ:
Ծրագիրը ֆինանսավորվում է Եվրոպական ներդրումային բանկի, Արևելյան եվրոպայի էներգախնայողության և շրջակա միջավայրի գործընկերության հիմնադրամի, Կանաչ կլիմայի հիմնադրամի և Երևան համայնքի բյուջեից»,- ասվում է հաղորդագրության մեջ:
Ըստ աղբյուրի՝ նախաձեռնությունը լինելու է շարունակական: Էներգաարդյունավետության ծրագրի երկրորդ փուլով նախատեսվում է հիմնանորոգել ևս 30 մանկապարտեզ: