ԵՐԵՎԱՆ, 16 ՍԵՊՏԵՄԲԵՐԻ, ԱՐՄԵՆՊՐԵՍ: Ադրբեջանի պատասխանատվությունն է նախքան COP29-ը ցույց տալ, որ անկեղծորեն ցանկանում է հասնել խաղաղության:
«Արմենպրես»-ի հաղորդմամբ՝ այս մասին ասաց Ֆրանսիայի Եվրոպայի և արտաքին գործերի նախարար Ստեֆան Սեժուրնեն Երևանում իր հայ գործընկերոջ հետ համատեղ ասուլիսում:
Հայաստանի և Ֆրանսիայի ԱԳ նախարարները հանդիպմանը խոսել են Հայաստանի և Ադրբեջանի հարաբերությունների մասին:
«Ֆրանսիան աջակցում է մի պայմանագրի ստորագրմանը, որը արդար ու կայուն խաղաղություն կհաստատի՝ հարգելով երկու երկրների սուվերենությունը, տարածքային ամբողջականությունը: Սա Ալմա-Աթայում 1991-ին ստորագրված փաստաթղթի ամբողջ իմաստն է: Պրահայում ևս քաղաքական հանրությանն այս նույն գաղափարն է ներկայացվել 2022-ին»,-ասաց Ֆրանսիայի ԱԳ նախարարը՝ կարևորելով խաղաղության հաստատումը:
Անդրադառնալով Հայաստանի և Ադրբեջանի միջև սահմանազատման գործընթացին՝ նա ասաց, որ օգոստոսի 30-ին ձեռք բերված համաձայնությունը ճիշտ ուղղությամբ է գնում: Ֆրանսիան աջակցում է այդ գործընթացին՝ հիմնվելով սուվերենության և տարածքային ամբողջականության սկզբունքներին:
«Հարավային Կովկասը պետք է դառնա խաղաղության և համագործակցության մի շրջան, որը հնարավորություն կտա զարգացնել առևտուրը, Հայաստանն էլ կբարգավաճի»,-նշեց Սեժուրնեն:
Նա ընդգծեց՝ Հայաստանը, Ֆրանսիան, միջազգային հանրությունը ցանկանում են խաղաղություն:
«Քանի որ Ադրբեջանը շուտով կհյուրընկալի COP29-ը, նրա պատասխանատվությունն է ցույց տալ, որ անկեղծորեն ցանկանում է հասնել այդ խաղաղությանը նախքան COP29-ը: Կարծում եմ՝ պետք է կարողանալ շատ արագ առաջ գնալ այս թեմայի ուղղությամբ»,-ասաց Սեժուրնեն:
COP29-ը նոյեմբերին կանցկացվի Ադրբեջանում: