Երևանի քաղաքապետարանը սուպերմարկետներում հայտնաբերել է ժամկետանց ու առանց պիտանելիության ժամկետի սննդամթերք
2 րոպեի ընթերցում
ԵՐԵՎԱՆ, 12 ՍԵՊՏԵՄԲԵՐԻ, ԱՐՄԵՆՊՐԵՍ: Մսամթերք, կաթնամթերք, հրուշակեղեն. այս օրերին Երևանի ցանցային սուպերմարկետներում ստուգվում են պարենային և ոչ պարենային բոլոր ապրանքների պիտանելիության ժամկետներն ու պահպանման պայմանները՝ սառնարանային ջերմաստիճանից մինչև ապրանքային տեսք: Երևանի քաղաքապետարանը հսկողությունն իրականացնում է սպառողների իրավունքները պաշտպանելու համար: Ինչպես «Արմենպրես»-ին տեղեկացրին Երևանի քաղաքապետարանից, խախտումների մեծ մասը ապրանքների արտադրման ժամկետների բացակայությունն է ու նաև կրկնապիտակները: Տնտեսվարողները խախտումների համար օրենքով տուգանվում են 100-200 հազար ՀՀ դրամի չափով:
«Քաղաքացիների իրավունքն է պահանջել ապրանքի պիտանելիության ժամկետի վերաբերյալ տեղեկատվությունը: Ժամկետանց ու նաև այն ապրանքները, որոնք առհասարակ չունեն ժամկետների վերաբերյալ համապատասխան մակնշում, վտանգավոր են առողջության համար»,- ասվում է հաղորդագրության մեջ:
Ըստ աղբյուրի՝ ստուգայցերի արդյունքները քաղաքապետարանը փոխանցում է նաև ՀՀ սննդամթերքի անվտանգության տեսչական մարմին: Ժամկետանց սննդամթերքը ենթակա է շուկայից հետ կանչման և ոչնչացման:
Նշվում է, որ հասարակական կարգի պահպանության ծառայությունը հսկողության ընթացքում ստուգում է նաև պոլիէթիլենային տոպրակների՝ սահմանված նորմերին համապատասխանությունը: Առանձին ուշադրություն է դարձվում նաև վաճառողների արտահագուստին:
Քաղաքապետարանի տեղեկացմամբ՝ ուժեղացված ստուգայցերը մեծ ու փոքր խանութներում շարունակական են: