Հնդկաստանի ռազմածովային ուժերը պլանավորում են 300 մլն դոլար արժողությամբ հեռակառավարվող սուզանավեր կառուցել
1 րոպեի ընթերցում
![Հնդկաստանի ռազմածովային ուժերը պլանավորում են 300 մլն դոլար արժողությամբ հեռակառավարվող սուզանավեր կառուցել](http://armenpress.am/resized/480/storage/images/articles/2024/09/12/c8aoCWEmvpC9rMaPefycB2jIZ1cip1q3vUuAPs6K.webp)
ԵՐԵՎԱՆ, 12 ՍԵՊՏԵՄԲԵՐԻ, ԱՐՄԵՆՊՐԵՍ: Հնդկաստանի պաշտպանության նախարարությունը հավանություն է տվել 25 միլիարդ ռուփի (գրեթե 300 միլիոն դոլար) արժողությամբ ծանր հեռակառավարվող սուզանավեր ստեղծելու՝ երկրի ռազմածովային ուժերի ծրագրերին: «Արմենպրես»-ն այս մասին տեղեկանում է ՏԱՍՍ գործակալությունից։
Նշվում է, որ ըստ The Economic Times-ի աղբյուրների՝ նման ստորջրյա դրոնների կառուցման հայտամրցույթը կհայտարարվի առաջիկա մի քանի ամսվա ընթացքում։ Հնդկական նավաշինարաններին առաջարկվում է ստեղծել ավելի քան 100 տոննա կշռող սուզանավեր՝ լայն ֆունկցիոնալով և երկար ժամանակ ջրի տակ մնալու հնարավորությամբ:
Ենթադրվում է, որ այդ ապարատներն ունակ կլինեն հարված հասցնել հակառակորդի սուզանավերին և վերջրյա նավերին, ինչպես նաև ռազմածովային ուժերին թույլ կտան իրականացնել բազմաթիվ գործողություններ, այդ թվում՝ ականների տեղադրում և ականազերծում, ծովում իրավիճակի վերահսկում և սպառազինության գործարկում։
Հաղորդվում է նաև, որ Հնդկաստանի ռազմածովային ուժերը շահագրգռված են հեռակառավարվող վերջրյա նավերի նավատորմի ստեղծմամբ, որոնք պլանավորվում է ապագայում լայնորեն օգտագործել հնդկական ռազմածովային ուժերի ներուժն ամրապնդելու համար։