ՀՀ-ում քրեական ոստիկանների կրթությանը կմասնակցի նաև ԱՄՆ Հետաքննությունների դաշնային բյուրոն
3 րոպեի ընթերցում
ԵՐԵՎԱՆ, 28 ՕԳՈՍՏՈՍԻ, ԱՐՄԵՆՊՐԵՍ: Հայաստանի Հանրապետության ներքին գործերի նախարարի տեղակալ Արփինե Սարգսյանն ընդունել է ԱՄՆ արդարադատության դեպարտամենտի հետաքննությունների դաշնային բյուրոյի (FBI)՝ Հայաստանում և Վրաստանում իրավական կցորդ Ալեքսանդր Թիգույի գլխավորած պատվիրակությանը։
Ինչպես «Արմենպրես»-ը տեղեկանում է ՀՀ ՆԳՆ-ի տարածած հաղորդագրությունից, ողջունելով նորանշանակ իրավական կցորդին՝ Արփինե Սարգսյանը վստահություն է հայտնել, որ արդյունավետ համագործակցությունը կշարունակվի նաև նրա պաշտոնավարման ընթացքում:
Անդրադառնալով իրավապահ համակարգում Հետաքննությունների դաշնային բյուրոյի փորձառության արդիականությանը՝ փոխնախարարը մատնանշել է Բյուրոյի հետ Քրեական ոստիկանության գլխավոր վարչության ամենօրյա աշխատանքը, այդ թվում՝ օպերատիվ-հետախուզական միջոցառումները, համատեղ իրականացված վերապատրաստումները։
Քրեական ոստիկանության վերաիմաստավորման շրջանակում Արփինե Սարգսյանն անդրադարձել է ՆԳՆ կրթահամալիրում ընթացող ապագա քրեական ոստիկանների վերապատրաստումներին։
Այդ գործընթացում փոխնախարարը կարևորել է օպերատիվ տվյալների մշակման և վերլուծության ուղղությամբ Բյուրոյի գործընկերների հետ փորձի փոխանակման և վերապատրաստումների անցկացման անհրաժեշտությունը , ինչը թույլ կտա շարունակելու ամրապնդել և կայունացնել ապագա քրեական ոստիկանների մասնագիտական կարողությունների զարգացումը։
Վերապատրաստման արդյունքում ապագա ծառայողները հնարավորություն կունենան կատարելագործել գիտելիքները կազմակերպված հանցավորության դեմ պայքարի, ապօրինի միգրացիայի, կիբեռհանցավորության և այլ ուղղություններով։
Ալեքսանդր Թիգույը շնորհակալություն հայտնելով ջերմ ընդունելության համար՝ բարձր է գնահատել ՆԳ նախարարության հետ սերտ փոխգործակցությունը և պատրաստակամություն է հայտնել փորձի փոխանակման շրջանակում ՆԳՆ կրթահամալիրի հետ ձևավորել համագործակցություն։
Քննարկվել են ծառայողների ուսումնառության, կրթական հնարավոր ուղղությունների ակտիվացման, ինչպես նաև այլ հարցեր։
Քննարկվել է նաև հետախուզվողների հայտնաբերման ուղղությամբ աշխատանքների կարևորությունը:
Պայմանավորվածություն է ձեռք բերվել ընդլայնելու համագործակցության օրակարգը։
Օգոստոսի 28-ին Ալեքսանդր Թիգույի գլխավորած պատվիրակությունն այցելել է ՆԳՆ կրթահամալիր։
Պատվիրակության անդամները ՆԳՆ կրթահամալիրի պետ Մանուկ Մուրադյանի ուղեկցությամբ հետևել են ապագա քրեական ոստիկանների և պարեկների վերապատրաստման դասընթացներին, ծանոթացել կրթական չափորոշիչներին և առանձնահատկություններին։