1 րոպեի ընթերցում
ԵՐԵՎԱՆ, 28 ՕԳՈՍՏՈՍԻ, ԱՐՄԵՆՊՐԵՍ: ՌԴ Վորոնեժի մարզում անօդաչու թռչող սարքերի գիշերային գրոհից հետո որոշում է ընդունվել տարհանել երկու բնակավայրերի բնակիչների: «Արմենպրես»-ի փոխանցմամբ՝ այս մասին հայտնել է մարզի ղեկավար Ալեքսանդր Գուսևը։
«Նրանց համար շրջկենտրոնում ժամանակավոր տեղակայման վայր է հատկացվել», - օգոստոսի 28-ի առավոտյան իր Telegram ալիքում գրել է նահանգապետը։
Գուսևի խոսքով՝ Ռոսոշանսկի շրջանում ՀՕՊ-ի հերթապահ ուժերը և ռադիոէլեկտրոնային պայքարի միջոցները հայտնաբերել և ոչնչացրել են ինքնաթիռային տիպի ԱԹՍ։ Տուժածներ և ավերածություններ չկան։ ԱԹՍ-ի բեկորների ընկնելուց բռնկում է առաջացել պայթյունավտանգ օբյեկտների մերձակայքում: Պայթյուն չի եղել, սակայն օպերատիվ ծառայությունները որոշում են կայացրել ժամանակավորապես տարհանել երկու բնակավայրերի բնակիչների։
«Բռնկումը հաջողվել է վերացնել տեղի ուժերով: Իրադրությունը կայունացել է: Բնակիչները վերադառնում են իրենց տներ։
Իր հերթին Astra հրատարակությունը, վկայակոչելով տեղի բնակիչներին, հաղորդել է, որ ԱԹՍ-ները հարվածել են Մալայա Մեժենկա ագարակում գտնվող զինամթերքի պահեստին։