Լճափի նոր կառուցվող առողջապահական կենտրոնից կօգտվի 4 գյուղի 4500 բնակիչ
2 րոպեի ընթերցում
![Լճափի նոր կառուցվող առողջապահական կենտրոնից կօգտվի 4 գյուղի 4500 բնակիչ](http://armenpress.am/resized/480/storage/images/articles/2024/08/21/mGsXiWH7RTPkQeiTT8yU9bPsotair3F0f04PJdL8.webp)
ԳԱՎԱՌ, 21 ՕԳՈՍՏՈՍԻ, ԱՐՄԵՆՊՐԵՍ։ Գեղարքունիքի մարզի Գավառ համայնքի Լճափ գյուղում շարունակվում են Առողջության առաջնային պահպանման կենտրոնի նոր շենքի շինարարական աշխատանքները, որոնք սկսվել էին 2023 թվականի նոյեմբեր ամսից։
Ինչպես «Արմենպրես»-ը տեղեկացավ Գեղարքունիքի մարզպետի աշխատակազմից, Լճափի ԱԱՊԿ կենտրոնի նոր շենքը կառուցվում է ՀՀ կառավարության կողմից իրականացվող «Առողջապահական համակարգի 2021-2026 թվականների բարեփոխումների ծրագրի» շրջանակներում՝ Հայաստան համահայկական հիմնադրամի միջոցների հաշվին։
Շինարարության պայմանագրային արժեքը կազմում է շուրջ 80 մլն դրամ։ 2024 թվականի օգոստոսի 20-ի դրությամբ շինարարական աշխատանքներն այստեղ իրականացվել են շուրջ 75 տոկոսով։ Նորակառույց միահարկ շենքը, պահանջված բոլոր պայմաններով հանդերձ, ունի նաև նկուղային հարկ։
Լճափի ԱԱՊԿ-ն սպասարկում է Գավառ համայնքի Լճափ, Բերդկունք, Հայրավանք, Ծովազարդ գյուղերի շուրջ 4500 բնակչի։ Ծրագրի իրականացման արդյունքում Լճափի ԱԱՊԿ-ն կունենա ամենաժամանակակից բոլոր պայմանները, ինչի շնորհիվ էապես կբարելավվի առողջության առաջնային պահպանման օղակում իրականացվող բուժսպասարկման որակը։
Շինարարական աշխատանքները նախատեսված է ավարտին հասցնել այս տարվա ընթացքում։
Շինարարական աշխատանքների մշտադիտարկման նպատակով օգոստոսի 20-ին Լճափի ԱԱՊԿ նորակառույց շենքի շինհրապարակում համատեղ այց են կատարել Գեղարքունիքի մարզպետ Կարեն Սարգսյանը և Գավառ համայնքի ղեկավար Գուրգեն Մարտիրոսյանը։
Խոսրով Խլղաթյան