Իզմիրում հրդեհները հասել են բնակելի թաղամասերին
1 րոպեի ընթերցում
![Իզմիրում հրդեհները հասել են բնակելի թաղամասերին](http://armenpress.am/resized/480/storage/images/articles/2024/08/16/4VQWYu8GI74mSimaFiRtE2IckXihZ8D6yAaAkwHS.webp)
ԵՐԵՎԱՆ, 16 ՕԳՈՍՏՈՍԻ, ԱՐՄԵՆՊՐԵՍ: Բնական հրդեհը, որն օգոստոսի 15-ին բռնկվել է Էգեյան ծովի ափին գտնվող թուրքական Իզմիր քաղաքի մերձակայքի Կարշիյակայի շրջանում, հասել է քաղաքի ծայրամասի բնակելի շրջաններ։ Չորսմիլիոնանոց քաղաքում թանձր ծխի քուլաներ են հայտնվել: «Արմենպրես»-ն այս մասին տեղեկանում է ՏԱՍՍ-ից։
Իզմիրի Բայրաքլի մունիցիպալիտետի իշխանությունները տեղի բնակիչներին կոչ են արել շտապ հեռանալ բնակելի շենքերից։
Հրդեհը տարածվում է ուժեղ քամու ազդեցության ներքո։ Այն մարելու համար ներգրավվել է երկու ինքնաթիռ, հինգ ուղղաթիռ և մեծ քանակությամբ ցամաքային տեխնիկա։
Օրվա ընթացքում մի քանի խոշոր բնական հրդեհներ են բռնկվել Թուրքիայի արևմուտքում և հյուսիս-արևմուտքում։ Հանրապետության գյուղատնտեսության նախարարությունը նախազգուշացում է տարածել Էգեյան ծովի ողջ շրջանում, ինչպես նաև մասամբ Միջերկրական, Մարմարա ծովերի շրջանում և Թուրքիայի կենտրոնական մասում հնարավոր անտառային հրդեհների մասին։
40 աստիճան տապի պատճառով տեղի բնակիչներին հորդորել են 10 օր շարունակ բաց կրակ չվառել, քանի որ դա կարող է հանգեցնել բնական հրդեհների։