Կոմիտասի 155-ամյակին ընդառաջ անցկացվելու է «Կոմիտասյան Հայաստան» խորագրով ֆլեշմոբ
2 րոպեի ընթերցում
![Կոմիտասի 155-ամյակին ընդառաջ անցկացվելու է «Կոմիտասյան Հայաստան» խորագրով ֆլեշմոբ](http://armenpress.am/resized/480/storage/images/articles/2024/08/06/eg4Spb77Bl9IrjsoLOhie4z7S5s4cnOvea8V7hpt.webp)
ԳՅՈՒՄՐԻ, 6 ՕԳՈՍՏՈՍԻ, ԱՐՄԵՆՊՐԵՍ: Կոմիտասի 155-ամյակին ընդառաջ «Յու. Հովհաննիսյանի անվան Արվեստի և գրականության ժողովրդական համալսարան»-ը նախաձեռնել է «Կոմիտասյան Հայաստան» խորագրով ֆլեշմոբ: Ինչպես տեղեկացնում է «Արմենպրես»-ը, ֆլեշմոբն անցկացվելու է սոցիալական ցանցերով: Մեկնարկելու է օգոստոսի 11-ին և ավարտվելու է Կոմիտասի ծննդյան օրը՝ սեպտեմբերի 26-ին:
Ներկայացնելով ֆլեշմոբի կանոնները՝ համալսարանի ռեկտոր Անահիտ Օհանյանը տեղեկացրեց, որ յուրաքանչյուր անհատ, ընկերություն կամ հաստատություն կարող է դառնալ այդ ֆլեշմոբի մասնակիցը: «Յուրաքանչյուր մասնակից «Ֆեյսբուք»-ի իր հարթակի ուղիղ եթերում կամ նախօրոք պատրաստված տեսահոլովակի ձևաչափով տեղադրում է Կոմիտասին վերաբերող նյութ՝ նկար, քանդակ, կամ հանդես է գալու երգով, բանաստեղծությամբ, ասույթով, հուշով: Անհրաժեշտ է տեղադրել նաև միջոցառման հեշթեգերը՝ #ԿոմիտասյանՀայաստան, #Կոմիտաս155»,- նշեց Անահիտ Օհանյանը՝ կարևորելով կոմիտասյան ֆլեշմոբի մասսայականացումը, կոչ անելով միանալ նախաձեռնությանը:
«Կոչ ենք անում հայությանը ակտիվ մասնակցել ֆլեշմոբին: Մեկ ակնթարթ միավորվենք մեծն Կոմիտասի շուրջ, մեր խոնարհումը բերենք ու դառնանք Վարդապետի ժառանգության իրավատերը»,- հավելեց Անահիտ Օհանյանը։
Արմենուհի Մխոյան